კორონავირუსის სტატისტიკა ამ დრომდე არ განახლებულა. ინფორმაცია არ მოიპოვება არც Stopcov.ge-ს და არც დაავადებათა კონტროლის ცენტრის ვებგვერდზე.

ჯანდაცვის მინისტრის მოადგილის, თამარ გაბუნიას თქმით, შეფერხების მიზეზი კიბერშეტევაა, რომელიც გუშინ ვაქცინაციის პორტალზე განხორციელდა და სხვა სისტემებიც დააზიანა.

"იგივე მიზეზი, რაც იყო პორტალის შეფერხების მიზეზი, კიბერშეტევის დროს დაზიანდა ეს სისტემები, მოდულები და ველოდებით განახლებას", — უთხრა თამარ გაბუნიამ On.ge-ს.

მისივე თქმით, კოვიდსტატისტიკის მიწოდების ერთიანი ბაზა შეფერხებულია.

"ესეც ხომ ავტომატური ბაზაა, რომელიც მიბმულია მომწოდებლებზე და მათ ყოველდღიურად შეჰყავთ მონაცემები. ესეც ცოცხალი ბაზაა, მიმდინარე რეჟიმში მუშაობს", — აღნიშნა მინისტრის მოადგილემ.

3 ივლისის მონაცემებით, საქართველოში კორონავირუსის 369 048 დადასტურებული შემთხვევაა, ხოლო გარდაიცვალა 5 347 ადამიანი.

პირველ ივლისს საქართველოში ჩინური ვაქცინის მილიონი დოზა შემოვიდა. მთავრობაში აცხადებდნენ, რომ ორშაბათიდან, 5 ივლისიდან ქვეყანაში მასობრივი ვაქცინაცია დაიწყებოდა. თუმცა ვაქცინის დაჯავშნის პორტალი ხარვეზებით მუშაობს.

Sinopharm-ისა და Sinovac-ის ახალ დოზაზე რეგისტრაცია 3 ივლისს, 12:00 უნდა დაწყებულიყო, ვებგვერდი რამდენიმე საათის განმავლობაში გათიშული იყო. პორტალი ახლა ჩართულია, თუმცა რეგისტრაცია მაინც რთულდება.

ჯანდაცვის მინისტრის მოადგილემ, თამარ გაბუნიამ გუშინვე განაცხადა, რომ პორტალზე კიბერშეტევა განხორციელდა. მისივე თქმით, ტექნიკური ჯგუფები 24-საათიან რეჟიმში მუშაობენ, თუმცა პრობლემის სრულად გადაჭრა ჯერჯერობით ვერ ხერხდება.

შინაგან საქმეთა სამინისტრომ გამოძიება ორი მუხლით დაიწყო — სისხლის სამართლის კოდექსის 285-ე და 286-ე მუხლებით, რაც კომპიუტერული მონაცემის, ანდა კომპიუტერული სისტემის უკანონოდ გამოყენებასა და ხელყოფას გულისხმობს.