ინფექციური საავადმყოფოს დირექტორის, თენგიზ ცერცვაძის განცხადებით, გულწრფელად ამბობენ, რომ საქართველოში ვაქცინაცია ყველაზე სუსტი რგოლია. ამის შესახებ მან რუსთავი 2-ის ეთერში ისაუბრა.

"რაც შეეხება ვაქცინაციას, ჩვენ ამას სავსებით გულწრფელად ვამბობთ, ეს არის ყველაზე სუსტი რგოლი ჩვენს კოვიდსაწინააღმდეგო კამპანიაში და აქ ნამდვილად ადგილი ჰქონდა დაგვიანებას. მე არა ვარ არცერთი საკოორდინაციო და არც ვაქცინაციის საბჭოს წევრი და დეტალური მიზეზები არ ვიცი. ვუსმენდი ბატონ პაატას და ვიზიარებ მის მოსაზრებას, იმიტომ, რომ საქართველოს ჰყავს ძალიან მოტივირებული ხელმძღვანელობა და ჯანდაცვის მესვეურები, მაგრამ საქართველოს არა აქვს ის ეკონომიკური რესურსი და ის გავლენა მსოფლიო რუკაზე" — თქვა მან.

საქართველოში ჩინური ვაქცინების, Sinopharm-ისა და Sinovac-ის მილიონი დოზა ჩამოვიდა. ამის შესახებ საქართველოს პრემიერმინისტრმა, ირაკლი ღარიბაშვილმა სპეციალურ ბრიფინგზე განაცხადა. ღარიბაშვილის თქმით, აღნიშნულ დოზებზე რეგისტრაცია ხვალ, 3 ივლისს დაიწყება.