ევროპული საქართველოს ლიდერის, გიგა ბოკერიას განცხდებით, პოლიცია ისევ გამშველებლის როლშია, რაც ჰომოფობიურ აქციაში მონაწილეეებისთვის არის წახალისება, რომ შემდეგში ისევ იძალადონ და დაუსჯელები დარჩნენ. ამის შესახებ მან ფორმულას ეთერში ისაუბრა.

"ვხედავთ სურათს, როდესაც ამ ხალხს ეძლევა შესაძლებლობა, არა მარტო სიტყვიერი შეურაცხყოფის მიყენების, არამედ ფიზიკურად, დისტანციურად შეურაცხყოფის, პოლიციელებზე თავდასხმის და მათ პრობლემა ამით არ ექმნებათ, მიუხედავად იმისა, რომ ჩვენი კანონმდებლობა სწორედაც სიძულვილით ნაკარნახევ ნებისმიერ დანაშაულებრივ ქმედებას დამამძიმებლად განიხილავს. ანუ, მაინც გამშველებლის როლშია პოლიცია და ეს არის წახალისება არა მხოლოდ 5-ისთვის, არამედ ზოგადად, შემდგომი პერიოდისთვის ამ ტიპის ჯგუფებისთვის, რომ ისევ იძალადონ და ჰქონდეთ განცდა, რომ რეალურად დაუსჯელები დარჩებიან", — თქვა მან.

გუშინ, პირველ ივლისს თბილისი პრაიდის კვირეული დაიწყო. პირველ ღონისძიებაზე ბრიტანული დოკუმენტური ფილმის პრეზენტაცია გაიმართა, რომელიც 2019 წლის პრაიდის მოვლენების შესახებ მოგვითხრობს.

ღონისძიებას რამდენიმე ათეული პირი ესწრებოდა, მათ შორის დიპლომატიური კორპუსის წარმომადგენლები — გერმანიისა და დიდი ბრიტანეთის ელჩები. ბრიტანეთის ელჩმა, მარკ კლეიტონმა დამსწრეებს სიტყვით მიმართა და ლგბტ თემს სოლიდარობა გამოუცხადა.

ღონისძიების პარალელურად შეკრებილნი იყვნენ ჰომოფობიური ჯგუფები, რომლებიც აგრესიულად იყვნენ განწყობილნი, ბოთლებს, ქვებსა და კვერცხებს ისროდნენ.

ადგილზე მობილიზებული იყო ათობით პოლიციელი. თუმცა პრაიდის ორგანიზატორები ამბობენ, რომ სამართალდამცავების ყოფნის მიუხედავად აშშ-ს საელჩოს წარმომადგენელს კვერცხი მოხვდა, ხოლო ერთ-ერთ სტუმარს დაარტყეს. ვითარება ადგილზე რამდენჯერმე დაიძაბა.

ფილმის ჩვენების შემდეგ უსაფრთხოების ზომებიდან გამომდინარე სტუმრებმა ტერიტორია პოლიციის კორდონის საშუალებით დატოვეს და შესასვლელთან მათ მიკროავტობუსები ელოდებოდათ. ამ ხნის განმავლობაში ჰომოფობიური ჯგუფების შეძახილები და ბოთლების სროლა არ წყდებოდა.