საქართველოს ფეხბურთის ფედერაციამ მედიათეკაში 3 მარტს ეროვნული ლიგის პრეზენტაცია გამართა.

პრეზენტაციამდე სიტყვით ფეხბურთის ფედერაციის პრეზიდენტი, ლევან კობიაშვილი გამოვიდა, რომელმაც ფეხბურთელებს წარმატება უსურვა და აღნიშნა, რომ ეროვნულ ლიგაში ქართველმა ფეხბურთელებმა თავი სრულფასოვან ფეხბურთელებად უნდა იგრძნონ:

"მე დარწმუნებული ვარ, რომ ეროვნული ლიგა იქნება საინტერესო, დაძაბული, კონკურენტუნარიანი და საინტერესო იმ ადამიანებისთვის, რომლებიც უნდა ჩავრთოთ. მე დარწმუნებული ვარ, ბევრი ადამიანი და ბევრი კომპანია ჩაერთვება იმიტომ, რომ მჯერა, ჩვენი ეროვნული ლიგა იქნება საინტერესო და მნიშვნელოვანი".

საქართველოს ჩემპიონატში სხვადასხვა ლიგას სახელი შეეცვალა და ამიერიდან უმაღლესი ჩემპიონატი ეროვნული ლიგა გახდა, ეროვნული ლიგა2-ის სახელი მიენიჭა პირველ ლიგას. ლიგის სახელთან ერთად შეიცვალა სიმბოლიკაც.

ცვლილება შეეხო ასევე მაისურებსაც. ეროვნული ლიგის მონაწილე კლუბების მაისურებზე დატანილი იქნება საქართველოს დროშა და ლიგის ლოგო. ამავდროულად, ახალი ინიციატივით, ფეხბურთელების გვარები მაისურზე ქართულ ენაზე იქნება დაწერილი.

პრეზენტაციაზე დავით მუჯირმა და ნიკა ჯღარკავამ ეროვნული ლიგის ვებგვერდი წარადგინეს, სადაც ყველა სიახლე განთავსდება. კლუბების შესახებ ინფორმაციის მიღება გულშემატკივრებს შემდეგ მისამართზე შეეძლებათ: eliga.ge

რაც შეეხება ლიგის პირდაპირ ტრანსლირებას, ტურის ცენტრალური მატჩის ტრანსლირება ტელევიზიით მოხდება, ხოლო დარჩენილ ოთხ თამაშს ფეხბურთის ფედერაციის ვებგვერდი უზრუნველყოფს. ყოველ შაბათს კი საზოგადოებრივ მაუწყებელზე ჩემპიონატის მიმოხილვა გაშუქდება, თვეში ერთხელ კი ვრცელი, შემაჯამებელი გადაცემა გაკეთდება.

ეროვნული ლიგა 4 მარტს აიღებს სტარტს. პირველ ტურში საქართველოს მოქმედი ჩემპიონი "სამტრედია" "შუქურას" უმასპინძლებს.