თბილისის საქალაქო სასამართლოს ყოფილი თავმჯდომარის, მამუკა ახვლედიანის თქმით, მოსამართლეებს 400-500 საქმე რომ აწერიათ, ეს ხელოვნურად შექმნილი კრიზისია, რათა ხელისუფლებასთან, საერთაშორისო ორგანიზაციებთან, საელჩოებთან მათ არგუმენტი ჰქონდეთ.

"ეს არის მათ მიერ ხელოვნურად შექმნილი კრიზისები, იგივეს აკეთებენ უზენაეს სასამართლოში, იგივე გააკეთეს სააპელაციო და პირველი ინსტანციის სასამართლოებში, აიყვანეს 400-500 საქმეზე თითო მოსამართლე, არ გაუგრძელეს დროებით მაინც ვადები სანამ დაინიშნებოდა, გაზარდეს ეს რაოდენობა და შემდგომ უკვე დააჩქარებინეს ხელისუფლებას, მესამე ტალღა იყო თუ არ ვცდები, რომ სწრაფად მიეღოთ ეს ყველაფერი, რომ დაენიშნათ, რომ არ მომხდარიყო კოლაფსი, თუმცა ეს ყველაფერი შექმნეს თვითონ. ზუსტად იგივე პროცესი არის აქაც", — აცხადებს ახვლედიანი ფორმულას ეთერში.

მისივე თქმით, მსგავსად პროცესები 2015 წელსაც განვითარდა, როდესაც პირველი ინსტანციის მოსამართლეების გადანიშვნები უნდა მომხდარიყო და ზუსტად იგივე ხდება დღესაც.

"2015 წელს, როდესაც უკვე პირველი ინსტანციის მოსამართლეების გადანიშვნები უნდა მომხდარიყო, ზუსტად ასე შექმნეს ხელოვნური კრიზისი. ეს კრიზისები, საქმეთა სიმრავლე, არ მართავენ ამ საქმეთა ნაკადებს და სპეციალურად ხდება მოსამართლეების არდანიშვნა, რომ დაგროვდეს საქმეები, შემდეგომ ჰქონდეთ ამის საფუძველზე ხელისუფლებასთანაც, საერთაშორისო ორგანიზაციებთან, საელჩოებთან, რომ ნახეთ როგორი სიტუაციაა, თითო მოსამართლეს აწერია ამდენი საქმე და თუ არ დავნიშნავთ, მოხდება კოლაფსი, ჩამოიშლება სასამართლო სისტემა, რაც რეალობას არ ასახავს", — განაცხადა საქალაქოს ყოფილმა თავმჯდომარემ.

იუსტიციის უმაღლესი საბჭოს თავმჯდომარემ, ნინო ქადაგიძემ 27 ივნისს იუსტიციის უმარლეს სკოლაში მოსამართლეთა შეკრების დასრულების შემდეგ განაცხადა, რომ თითოეულ მათგანს 400-500 საქმე აწერია.

17 ივნისს იუსტიციის უმაღლესმა საბჭომ პარლამენტს უზენაესი სასამართლოს მოსამართლეობის 9 კანდიდატს წარუდგინა. კერძოდ, გიორგი გოგიაშვილი, გოჩა აბუსერიძე, ლევან თევზაძე, ქეთევან მესხიშვილი, გიორგი შავლიაშვილი, რევაზ ნადარაია, ბიძინა სტურუა, ეკა ზარნაძე, ლაშა გოჩიაშვილი. საბჭოს არამოსამართლე წევრი, ნაზი ჯანეზაშვილი On.ge-სთან დადებითად აფასებს ქეთი მესხიშვილისა და ეკა ზარნაძის წარდგენას, თუმცა ამბობს, რომ ამ მოდელით უმრავლესობაში კვლავ ე.წ. კლანი რჩება, კარგი მოსამართლეები კი — უმცირესობაში.

აღსანიშნავია, რომ შარლ მიშელის დოკუმენტის ერთ-ერთი მთავარი პუნქტი სასამართლო რეფორმას ეხება. შეთანხმების მიხედვით, არსებული წესით უზენაეს სასამართლოში მოსამართლეების დანიშვნისგან თავი უნდა შეიკავონ. ამასთან, მითითებულია, რომ პარლამენტს უნდა წარედგინოს უზენაეს სასამართლოში დანიშვნის კანონპროექტი, სადაც გათვალისწინებული იქნება 2019 წელს გამოქვეყნებული ვენეციის კომისიის დასკვნა, ღია კენჭისყრა იუსტიციის უმაღლეს საბჭოში და ამ უკანასკნელის ნომინაციების დასაბუთების აუცილებლობა.

ასევე, უნდა მოხდეს იუსტიციის უმაღლესი საბჭოს არსებითი რეფორმა გამჭვირვალობის, მთლიანობის და სანდოობის მიზნით, მათ შორის დანიშვნებში, შეფასებებში, დაწინაურებებში, ტრანსფერებში, შედგენილია ზომები და საჩივრები, რომლებიც წარედგინება ვენეციის კომისიას და ეუთო/დემოკრატიული ინსტიტუტებისა და ადამიანის უფლებათა ოფისს (ODIHR) მოსაზრებისთვის და რეკომენდაციებისთვის, რაც სრულად უნდა შესრულდეს.