აშშ-ის ელჩის კელი დეგნანი იმედს გამოთქვამს, რომ ღირსების მარში მშვიდობიანად, ძალადობის გარეშე ჩაივლის.

"საქართველო ასეულობით წლებია ადამიანის უფლებების დაცვისთვის იბრძვის. სამწუხაროა, რომ ზოგიერთს სურს ძალადობის გამოყენებით ხელი შეუშალოს ადამიანის ფუნდამენტურ უფლებებს, როგორიცაა თავისუფალი შეკრებისა და გამოხატვის უფლება. რა თქმა უნდა, ეს ქმნის სერიოზულ პრობლემას სამართალდამცავი ორგანოებისთვის, რომელთაც აქვთ ვალდებულება, რომ ადამიანების თავისუფალი შეკრების უფლებისა და აზრის გამოხატვის თავისუფლების დაცვა უზრუნველყონ. ვიმედოვნებ, რომ ღირსების მარში მშვიდობიანად, ძალადობის გარეშე ჩაივლის", — განაცხადა დეგნანმა.

Tbilisi Pride 5 ივლისს ღირსების მარშს გამართავს, რომელიც კვირეულის ფარგლებში ეწყობა. მარშის სლოგანია "გამოდი სოლიდარობისთვის".

ძალადობრივი და ჰომოფობიური ჯგუფის ლიდერი, ლევან ვასაძე ღირსების მარშის გაუქმებას მოითხოვს და ხელისუფლებას ამისთვის 10-დღიან ვადას აძლევს.

გარდა ამისა, ვასაძე ქართული ოცნებისგან ისეთი კანონმდებლობის მიღებას მოითხოვს, რომელიც ქვიარ თემის გამოხატვის თავისუფლებას შეზღუდვას.

თბილისი პრაიდის მარშის ჩატარებაზე ლევან ვასაძის ულტიმატუმს მმართველი პარტიიდან თავდაპირველად გია ვოლსკი გამოეხმაურა და თქვა, რომ "ამის პოპულარიზაციისა და რეკლამირების" წინააღმდეგია.

ქართული ოცნების თავმჯდომარის, ირაკლი კობახიძის განცხადებით, "სრული კონტექსტის გათვალისწინებით", პრაიდის კვირეულის ჩატარებაზე უარი უნდა ეთქვათ.

ჯანდაცვის ყოფილმა მინისტრმა და საქართველოს პარლამენტის წევრმა, დავით სერგეენკომ კი ჰომოფობიურ განცხადება გააკეთა. ამასთან, პრაიდის კვირეულთან დაკავშირებით მან "ზომიერებისა" და "ნაკლები ენთუზიაზმისკენ" მოუწოდა.

ღირსების მარში თბილისში პირველად 2019 წლის ივლისში გაიმართა. ჰომოფობიურმა და ძალადობრივმა ჯგუფებმა მისი ჩაშლა მაშინაც სცადეს, თუმცა მარში მაინც ჩატარდა.