ჩვენს მკითხველს ახსოვს ციცქნა ქოხიდან დახსნილი 75 მახინჯაურელი ფისოს ამბავი, რომელიც აქტივისტებმა თბილისში ჯერ კიდევ ზამთარში ჩამოიყვანეს. კატები შემგროვებელს 10მ2-ში ჰყავდა მოთავსებული და მათი მდგომარეობა საკმაოდ მძიმე იყო.

ამ პერიოდში აქტივისტებმა დონაციებითა და კერძო ინიციატივების დახმარებით კატების სტერილიზაცია და მკურნალობა შეძლეს. თვეების განმავლობაში ისინი საკუთარი ხარჯებითა და რესურსით უვლიდნენ ცხოველებს.

75-დან ერთი ჯანმრთელობის უმძიმესი მდგომარეობის გამო ვერ გადარჩა, უმრავლესობა გაჩუქდა, და დარჩა ერთადერთი ფისო, რომელიც რამდენიმე დღე თავშესაფარში მარტოა და ფისომოყვარულ ცხოვრების მეგზურს ელის.

X05

დღეს სწორედ ამ უკანასკნელ მოჰიკანზე მოგიყვებით, რომელიც ბოლო გადარჩენილია სახლისა და მზრუნველი ოჯახის გარეშე. მას სახელი არ აქვს, რადგან რადგან აქტივისტები მიიჩნევენ, რომ კატებმა ახალი ცხოვრება ახალი სახელით უნდა დაიწყონ, რომელსაც ასევე ახალი მეგობრები შეურჩევენ.

ფისოს სიმბოლური ნომერი აქვს — X05, თუმცა ამბობენ, რომ ძველი მეგობრებისგან გამორჩეულ სამფერა კატას ინანას და იშთარსაც ეძახდნენ.

Animal Project-ის აქტივისტები იმ ადამიანებს, რომლებსაც ცხოველების აყვანა სურთ, მახინჯაურელი ფისოს შეფარებას ურჩევენ. ასე რომ, თუ კატის აყვანა და თან ძალიან კეთილი საქმის გაკეთება გსურთ, შეგიძლიათ არჩევანი უმძიმესი პირობებიდან დახსნილ ცხოველზე გააკეთოთ, რომელიც თავისი ძველი მეგობრების მსგავსაც მზრუნველ და მოსიყვარულე მეგობარს და დარჩენილი ცხოვრების ღირსეულად გატარებას იმსახურებს.

X05 გასტერილებული, აცრილი და სხვადასხვა ინფექციაზე დამუშავებულია. მას გარეგნობაც გამორჩეული აქვს — სხვადასხვაფერის თვალები და სამფერი, გრძელი ბეწვი ამშვენებს. აქტივისტები მისი სახლში წაყვანის მსურველს ქვიშას და დიდი ხნის სამყოფ საკვებსაც პირდებიან.

თუ ფიქრობთ, რომ ეს ზუსტად ის არსებაა, რომლის მიმართაც სიყვარულს არ დაიშურებთ და გსურთ, რომ შინ წაიყვანოთ, მაშინ ფეისბუქგვერდს, მახინჯაურის ფისოებს შეგიძლიათ მისწეროთ.

ამავე თემაზე: