პრემიერ მინისტრი, გიორგი კვირიკაშვილი კორცხელში მომხდარ ძალადობის ფაქტებს გმობს და იუსტიციის სამინისტროს ავალებს, სასწრაფოდ, უახლოეს მთავრობის სხდომაზე წარმოადგინოს საკანონმდებლო ცვლილებები, რომლებითაც პოლიტიკურ და საარჩევნო პროცესებში ძალადობის ყოველგვარ გამოვლინებაზე სანქციები გამკაცრდება:

"ხელისუფლება არ დაუშვებს ძალადობას საარჩევნო პროცესში, ჩვენი რეაგირება იქნება უმკაცრესი ნებისმიერი მოძალადის მიმართ, რომელი პოლიტიკური ძალის მხარდამჭერიც არ უნდა იყოს ის".

კვირიკაშვილის განმარტებით, აღნიშნული ინციდენტით ქართულ სახელმწიფოსა და თითოეულ ჩვენგანს მიადგა ზიანი:

"ამ ფაქტზე უკვე დაიწყო გამოძიება და შინაგან საქმეთა სამინისტროსგან ველოდები, რომ უმოკლეს დროში გამოავლენენ ძალადობაში ეჭვმიტანილ ყველა პირს, რომლებიც კანონის მთელი სიმკაცრით აგებენ პასუხს".

მისი თქმით, აუცილებელია არჩევნები დემოკრატიული სტანდარტების დაცვით ჩატარდეს, თითოეულ მოქალაქეს მიეცეს თავისუფალი არჩევანის გაკეთების საშუალება და ყველა პოლიტიკური სუბიექტისათვის უზრუნველყოფილი იყოს მშვიდი და კონკურენტული საარჩევნო გარემო.

ზუგდიდში, კორცხელის საარჩევნო უბანზე, სადაც შუალედური ადგილობრივი თვითმმართველობის არჩევნები მიმდინარეობდა, ნაციონალური მოძრაობის წევრებს, მათ შორის გიგა ბოკერიასა და ნიკა მელიას, ფიზიკური შეურაცხყოფა მიაყენეს.