ნაციონალურმა მოძრაობამ სოფელ კორცხელში მომხდარი ჩხუბის გამოძიების მოთხოვნით, პროკურატურაში სარჩელი შეიტანა. დოკუმენტი პროკურატურაში პარტიის წევრებმა თინათინ ბოკუჩავამ და ირაკლი აბესაძემ მიიტანეს.

ირაკლი აბესაძის განცხადებით, შინაგან საქმეთა სამინისტრომ მსუბუქი მუხლით, ცემის ფაქტზე დაიწყო გამოძიება. მისივე თქმით, სისხლის სამართლის კოდექსში არის მუხლები, რომელიც ითვალისწინებს პოლიტიკური თანამდებობის პირებზე თავდასხმას, მათი საქმიანობის ხელის შეშლის მიზნით, ამიტომ პროკურატურამ სწორედ ამ მუხლებით უნდა იხელმძღვანელოს:

"ცემა არის, როდესაც არსებობს უბრალოდ რაღაც საყოფაცხოვრებო მოტივი, რომლის შედეგად არავინ არ დაზარალდა. როდესაც ვხედავთ წინასწარ ორგანიზებულ ჩხუბს, რომლის მიზანიც არის პოლიტიკური თანამდებობის პირებზე თავდასხმა და გამოიყენება ცივი იარაღი, ეს ჩვეულებრივი ცემა აღარ არის. პროკურატურამ ამის შესაბამისი რეაგირება უნდა მოახდინოს - ან აღიაროს სახელმწიფომ, რომ ეს არის პოლიტიკური დაკვეთა, ან დასაჯონ ის ადამიანები ვინც მძიმე დანაშაული ჩაიდინა".

თინათინ ბოკუჩავა აცხადებს, რომ მათ სარჩელს კონკრეტული სახელები და ვიდეომასალა ახლავს თან. მისი თქმით, გუშინდელი ზუგდიდის ინციდენტი ვიცე პრემიერ კახი კალაძის ორგანიზებით მოხდა.

"შევიტანეთ სარჩელი კონკრეტული სახელებით, გვარებით და ვიდეომასალით, სადაც იდენტიფიცირებულია ის პირები, რომლებიც გუშინ კახი კალაძემ მიაქსია ნაციონალური მოძრაობის ლიდერებს".