ჩვენი ქვეყნის ისტორია მოგვითხრობს ბევრ საამაყო ადამიანზე, რომელთა ღვაწლმაც საქართველოს დაუვიწყარი წარსული განსაზღვრა, აწმყოზე იქონია გავლენა და მომავალშიც სამაგალითო იქნება. ყველა ჩვენგანი იცნობს არაერთ მეცნიერს, ხელოვანს თუ ისტორიულ ფიგურას, მათი ცხოვრების ამბავიც კარგად ვიცით, ნაწილს ქართულ სუფრასთან შეკრებილებიც კი გავიხსენებთ ხოლმე, მაგრამ ისეთი ისტორიებიც მრავლად არის, ჯერ რომ არ გვსმენია.

თბილღვინოს ახალი ვიდეოების სერია — ჭიქა ღვინო და ერთი ამბავი სწორედ იმ ამბებს აერთიანებს, რომელთაც ეს სასმელი განსაკუთრებით უხდება.

ჭიქა ღვინო და ერთი ამბავი

თითოეული ვიდეო თითო ამბის შესახებ იქნება, ისტორიებს კი ცნობილი ადამიანები პირველ პირში გიამბობენ. ზოგ ამბავს ჩვენი დროის სამაგალითო პირები მოგიყვებიან, ზოგსაც ანიმაციური გმირებისა და გახმოვანების საშუალებით გაიგებთ.

ცისფერი ყანწები

უკვე შეგიძლიათ მოუსმინოთ პაოლო იაშვილის პოეტურ მონათხრობს 1915 წლის ზაფხულის იმ საღამოზე, რომელმაც პაოლოს ახალი ლიტერატურული ჟურნალისთვის ცისფერი ყანწების დარქმევა გადააწყვეტინა.

ლადო გუდიაშვილის პარიზული თავგადასავალი

ლადო გუდიაშვილი პარიზში მოგზაურობის თავგადასავალს მოგიყვებათ — მოდილიანთან შეხვედრას გაიხსენებს და ამ დიდი ხელოვანის პორტრეტს მცირე ისტორიის საშუალებით დაგანახებთ.

უძველესი ქვევრისა და ღვინის ამბავი

არქეოლოგი მინდია ჯალაბაძე, რომელსაც ქართული ღვინის 8000-წლიანი ისტორიის დადასტურებაში უდიდესი წვლილი აქვს, გიამბობთ ისტორიას პირველი ქვევრის აღმოჩენისა და ქართული ღვინის ფესვების შესახებ.

შოთა რუსთაველის ფრესკა

პოეტი-აკადემიკოსი, ირაკლი აბაშიძე ენათმეცნიერებთან, აკაკი შანიძესა და გიორგი წერეთელთან ერთად იერუსალმში მოგზაურობის ამბავს მოგითხრობთ და თვალწინ გაგიცოცხლებთ შოთა რუსთაველის ფრესკის აღმოჩენის ჯადოსნურ წამს.

პირველი ქართველი მეღვინე ქალი

სალომე დადიანი ქალთა შორის პირველი ქართველი მეღვინეა და ჭიქა ღვინოზე მოსაყოლ ამბად სწორედ ამ საქმიანობის წამოწყების ისტორია შეარჩია. მეღვინე ქალი 1873 წელს სამეგრელოში დაბრუნების, ქართული ვაზის ჯიშებისგან ვენახის გაშენების და ამ ჯიშების გადარჩენის ამბავს გაიხსენებს.

ამ სერიის ყველა ამბავი სამშობლოს სიყვარულით გულანთებული ადამიანების მონათხრობს გააერთიანებს, ერთი მხრივ ჩვენი დროის სამაგალითო ადამიანები, მეორეს მხრივ კი გარდასულ დღეთა დიდი მოღვაწეები. ამ ვიდეოსერიების შემდეგი ეპიზოდებიც ჩვენი ქვეყნის თავბრუდამხვევი ისტორიის კარს შეგიღებთ, რომლებმაც ჩვენს დღევანდელობას წარუშლელი კვალი დაამჩნია. დროა ჭიქა ღვინით შეივსოთ, მოკალათდეთ და საინტერესო ამბები მოისმინოთ.

1962 წელს, საქართველოში ერთ-ერთი მაღალხარისხოვანი, საექსპორტო ღვინის მწარმოებელი საწარმო გაიხსნა, რომელმაც მალევე მოიპოვა საერთაშორისო აღიარება. 1999 წლიდან კომპანიას სათავეში ძმები ზურაბ და გიორგი მარგველაშვილები ჩაუდგნენ, რითაც სათავე დაედო სრულიად ახალ ეტაპს თბილღვინოს ისტორიაში. საფუძველი ჩაეყარა ღვინის წარმოების ახალ, თანამედროვე ფილოსოფიას, რომლის წინაპირობა არის მომხმარებელი — ინდივიდუალური სურვილებითა და განსხვავებული გემოვნებით.

დღესდღეობით თბილღვინო აკონტროლებს და მართავს წარმოების სრულ ჯაჭვს — ვენახებისთვის მიწის სწორი შერჩევიდან, გასაყიდ ობიექტზე პროდუქციის დისტრიბუციამდე, რაც განაპირობებს საუკეთესო ხარისხს. თბილღვინოს ვენახები 355 ჰექტარზე არის გაშენებული, ქინძმარაულისა და მუკუზანის მიკროზონებში.