ქართული ოცნების თავმჯდომარის, ირაკლი კობახიძის განცხადებით, ჯარიმებზე ამნისტიაზე მოსყიდვის ინტერესი რომ ყოფილიყო, გაკეთდებოდა სექტემბერში.

"ნებისმიერ ამნისტიაში თავისი არსით არის უსამართლობის მარცვალი, ამნისტია ეხება სამართალდამრღვევს, ასეთ დროს, ბუნებრივია, გარკვეული უსამართლობა ყოველთვის არის. ნებისმიერ ამნისტიას ეს ახასიათებს, მაგრამ საბოლოო ჯამში, კოვიდმა სხვადასხვა ფორმით დააზარალა ადამიანები, მათ შორის სამართალდამრღვევებიც და როდესაც ეს პროცესი არის უკვე გადავლილი, რა თქმა უნდა, სახელმწიფოს და ხელისუფლებას მართებდა ამაზე მსჯელობა და მე ვფიქრობ, რომ ძალიან სწორი გადაწყვეტილება იქნება მიღებული. მოსყიდვის ინტერესი რომ ყოფილიყო, გაკეთდებოდა, მაგალითად, სექტემბერში ეს ყველაფერი, მაგრამ გაკეთდა ბევრად უფრო ადრე, ვიდრე ტარდება თვითმმართველობის არჩევნები", — განაცხადა კობახიძემ.

პრემიერმინისტრის, ირაკლი ღარიბაშვილის განცხადებით, კოვიდრეგულაციების დარღვევის გამო დაწესებული გადაუხდელი ჯარიმები გაუქმდება. ღარიბაშვილის თქმით, საუბარია იზოლაციის, კარანტინის და პირბადის ტარების წესის დარღვევის გამო დაკისრებულ დაახლოებით 76 მლნ ლარის გადაუხდელ ჯარიმებზე.