20 ივნისს დაზარალებულების განცხადებით, მათი თვითმიზანი კონკრეტული ფინანსური ანაზღაურების მიღება არ ყოფილა. ამის შესახებ მათ საერთო განცხადება გაავრცელეს და ასე გამოეხმაურნენ ოპოზიციური ფრაქციების მიერ დარეგისტრირებულ კანონპროექტს 20 ივნისს დაზარალებულთა კომპენსაციის შესახებ.

"ჩვენ, 20 ივნისს დაშავებული მშვიდობიანი დემონსტრანტები 2 წელია ვითხოვთ ჩვენი შელახული უფლებების სამართლებრივ აღდგენას, დაზიანებული ჯანმრთელობის რეაბილიტაციისთვის სახელმწიფო გარანტიების მიღებასა და შესაბამისი დამნაშავეების დასჯას. ეს არის ჩვენი მოქალაქეობრივი და ადამიანური პოზიცია. ჩვენი თვითმიზანი არასდროს ყოფილა კონკრეტული ფინანსური ანაზღაურების მიღება", — აცხადებენ ისინი.

20 ივნისს დაშავებულთა საინიციატივო ჯგუფი მიიჩნევს, რომ ოპოზიციის კანონპროექტი წარმოადგენს წარუმატებელ პოლიტიკურ მცდელობას ამნისტიის საკითხთან დაკავშირებით მორალური სახის შენარჩუნების და მთლიანად ეწინააღმდეგება დაშავებულების ორ წლიანი სამართლებრივი და პოლიტიკური ბრძოლის სულისკვეთებას. მათი განცხადებით, თავს ბოლომდე იბრძოლებენ იმისთვის, რომ 20 ივნისის ღამეზე კონკრეტული სამართლებრივი შედეგი დადგეს.

"კონკრეტული შედეგის დადგომა მნიშვნელოვანია იმისთვისაც, რომ მომავალში ვერცერთმა მთავრობამ ჩვენ ქვეყანაში ვეღარ გაბედოს გამიზნულად საათების მანძილზე ათეულობით და ასეულობით მოქალაქის დასახიჩრება და დაზიანება", — აღნიშნულია განცხადებაში.

ხელმომწერების თქმით, მათთვის მიუღებელია მიშელის შეთანხმების ის პუნქტი, რომელიც 19-21 ივნისის მოვლენების ამნისტიას ეხებოდა და რომელზედაც ხელმოწერის შემდგომ ოპოზიციის ნაწილი "ცდილობს ამნისტიის შედეგად დამდგარი შედეგი დაზარალებულებისთვის ნაკლებად მტკივნეული გახადოს".

"თუმცა მათ კარგად უნდა ესმოდეთ რომ ამ ორი წლის მანძილზე ოპერაციების, სულიერი და ფიზიკური ტკივილის გადატანის მთავარ მოტივაციას დაშავებულთათვის არა კონკრეტული ფინანსური დახმარების მიღება, არამედ საქმის გამოძიება და სიმართლის დადგენა წარმოადგენდა", — აცხადებს ის.

განცხადებას ხელს აწერენ:

  • გიორგი სულაშვილი;
  • დავით ქურდოვანიძე;
  • მაკო გომური;
  • ლუკა პეტრიაშვილი;
  • დემეტრე ნაყოფია;
  • გიორგი ბულისკერია;
  • კობა ლეთოდიანი;
  • ირაკლი ხვადაგიანი;
  • ირაკლი ფავლენიშვილი;
  • დავით ხვადაგიანი;
  • ზაზა მღებრიშვილი.

გუშინ 23 ივნისს პარლამენტში 20 ივნისს დაზარალებულებისთვის კომპენსაციის კანონპროექტი ფრაქციებმა, შარლ მიშელის რეფორმების ჯგუფმა და ლელომ დაარეგისტრირა. როგორც სტრატეგია აღმაშენებლის ლიდერმა, გიორგი ვაშაძემ, კანონპროექტის ინიცირებისას განაცხადა, ის ყველა დაზარალებულისთვის ერთჯერად კომპენსაციას, საპენსიო უზრუნველყოფას და სიცოცხლის ბოლომდე სამედიცინო ხარჯების სრულად ანაზღაურებას ითვალისწინებს.