TV პირველის საგამოძიებო გადაცემის ავტორი, ნოდარ მელაძე პროკურატურის ბრიფინგს ეხმაურება და ამბობს, რომ უწყების მიზანი ჟურნალისტების დაშინება და თავდასხმაა.

როგორც მელაძე აღნიშნავს, პროკურატურამ აღიარა, რომ არაფორმალური გარჩევები ეწყობოდა და სამართალდამცველების ფუნქციას არაუფლებამოსილი პირები ითავსებდნენ. გარდა ამისა, იგი აცხადებს, რომ არაა პასუხი კითხვებზე, ჩანაწერების გავრცელების შემდეგ დაიკითხნენ თუ არა ბერა ივანიშვილი და ირაკლი ღარიბაშვილი.

"ამაზე ჩვენ პასუხები არ მოგვისმენია, მოვუსმინეთ მხოლოდ ის, რომ დაკითხულია წინა ხელისუფლების რამდენიმე წარმომადგენელი, რომელიც მსგავსი შინაარსის საუბარს ისმენს. საქართველოს პროკურატურის მიზანი არის ჟურნალისტების დაშინება და თავდასხმა, რომ მათ აღარ მოამზადონ მსგავს უკანობობებთან დაკავშირებით რეფორტაჟები და არ ჩანს სურვილი, რომ რეალური გამოძიება ჩატარდეს", — ამბობს მელაძე.

TV პირველის მიერ ფარული ჩანაწერების გავრცელებიდან 4 თვეში პროკურატურამ ბრიფინგი გამართა, სადაც განაცხადა რომ ჩანაწერში ვერ დაინახა დანაშაულის ნიშნები ბერა ივანიშვილის, ირაკლი ღარიბაშვილისა და ანზორ ჩუბინიძის მხრიდან. ამავდროულად, პროკურატურა ამტკიცებს, რომ ჩანაწერები მოდელირებული და გაყალბებულია და არანაირი მტკიცებულებითი ძალა არ გააჩნია. უწყებამ ყურადღება გაამახვილა იმაზეც, რომ წინა ხელისუფლების დროს აღნიშნულ პირებს უკანონოდ უსმენდნენ.

პროკურატურის მტკიცებით, ჩანაწერების შესწავლამ გამოავლინა, რომ იყო მცდელობა არამხოლოდ ფრაზების, არამედ სიტყვებისა და ბგერების ამოჭრით შექმნილიყო დიალოგი. მაგალითად, უწყება ამტკიცებს, რომ ბერა ივანიშვილი არ ამბობს, რომ ირაკლი ღარიბაშვილს "დაურეკავენ მინისტრები", არამედ ორი სიტყვის შეერთებით მიღებულია სიტყვა "მილი სტები".

უწყებაში, ასევე, ამბობენ, რომ კერძო საუბრის კომუნიკაციის ჩანაწერის, უკანონოდ გამოყენებისა და გავრცელების ფაქტზე გამოძიება არ მიმდინარეობს ჟურნალისტების ან მედია საშუალების მხრიდან საჯარო სივრცეში აღნიშნული ტიპის ჩანაწერის გავრცელებაზე პასუხისმგებლობის მიმართულებით.