არასამთავრობო ორგანიზაციებმა გაეროს ქალთა მიმართ დისკრიმინაციის ყველა ფორმის აღმოფხვრის კონვენციის (CEDAW) ალტერნატიული ანგარიში წარადგინეს. ორგანიზაცია საფარის ოფისში გამართულ პრესკონფერენციაზე ითქვა, რომ ანგარიში კოალიციურია და მოიცავს იმ ძირითად პრობლემებს, რომელიც საქართველოში ქალებს დღემდე აწუხებთ.

"არასამთავრობო ორგანიზაციები ამზადებენ ამ ჩრდილოვან ანგარიშებს, რადგან სახელმწიფო ცდილობს, რომ მხოლოდ სიახლეები, პოზიტიური მიმართულებები და ზოგჯერ ტყუილებიც კი შეიძლება იყოს დაწერილი ამ ანგარიშში. იმისათვის, რომ ჰქონდეს გაეროს უფრო ობიექტური სურათი, არასამთავრობო ორგანიზაციები აგზავნიან უკვე კრიტიკულ ანგარიშებს", — აღნიშნა საფარის ხელმძღვანელმა, ბაია პატარაიამ.

მანვე განაცხადა, რომ სახელმწიფოს კონვენციის შესრულების მეექვსე პერიოდული ანგარიში 2018 წლის ივლისში უნდა წარედგინა, თუმცა დააგვიანა და ეს მხოლოდ გასული წლის ნოემბერში გააკეთა.

ალტერნატიული ანგარიშის შექმნაში კოალიცია თანასწორობისთვის და კიდევ რამდენიმე ადგილობრივი არასამთავრობო ორგანიზაცია იყო ჩართული. დოკუმენტში საუბარია ქალთა მიმართ ძალადობაზე, ქალთა პოლიტიკურ მონაწილეობაზე, განათლებაზე, დასაქმებაზე, ჯანმრთელობაზე, სხვადასხვა მოწყვლადი ჯგუფების მდგომარეობაზე, ასევე, ქორწინებასა და ოჯახურ ურთიერთობებზე.

საფარის იურისტი, ნათია გამხიტაშვილი ამბობს, რომ პანდემიის პერიოდში ქალთა მიმართ ძალადობა კიდევ უფრო გაიზარდა და არასამთავრობო ორგანიზაციებისადმი მიმართვიანობაც გაიზარდა. მისივე თქმით, გამოწვევას წარმოადგენს, რომ ეთნიკური უმცირესობებისთვის განათლებაზე და რეპროდუქციულ ჯანმრთელობაზე ინფორმაცია ხელმისაწვდომობა არის დაბალი.

ორგანიზაცია ჰერას წარმომადგენელი, სალომე იობაძე აღნიშნავს, რომ დოკუმენტში ისინი შეეხნენ იმ ვალდებულებებსაც, რომელიც სახელმწიფომ აიღო სხვადასხვა საერთაშორისო შეთანხმებების ფარგლებში.

"ერთ-ერთი ჩვენი მთავარი რეკომენდაცია ეხება სასწავლო კურიკულუმებში, მათ შორის სკოლებში, ყოვლისმომცველი ინფორმაციისა და განათლების დანერგვას სექსუალურ და რეპროდუქციული ჯანმრთელობისა და უფლებების შესახებ. [...] ჩვენ ყურადღება გვქონდა გამახვილებული პირველად ჯანდაცვის რგოლში არსებულ ხარვეზებზე, თავად სისტემის სისუსტეზე, მისი მზაობის ნაკლებობაზე, რომ პანდემიის პერიოდში უზრუნველყოს სერვისების უწყვეტობა", — განაცხადა იობაძემ.

როგორც პრესკონფერენციაზე აღინიშნა, ანგარიშს წარადგენენ სახელმწიფო, ომბუდსმენი, გაეროს ორგანიზაციები საქართველოდა და სამოქალაქო სექტორი. ყველა ანგარიშის განხილვის შემდეგ კომიტეტი რეკომენდაციების სიას წარადგენს.