აფხაზეთის დე ფაქტო რესპუბლიკის ყოფილი პრეზიდენტის, ასლან ბჟანიას თქმით, საქართველოს პრეზიდენტ სალომე ზურაბიშვილს "არ აქვს რაიმე სიმპათია აფხაზეთის ხელისუფლებისა და ოპოზიციის მიმართ" და მას უბრალოდ აფხაზეთში "სიტუაციის გაუარესება" სურს. ამის შესახებ მან რუსულ გამოცემა RIA-თან განაცხადა.

"ძალიან მეეჭვება, რომ სალომე ზურაბიშვილს რაიმე სიმპათია ჰქონდეს აფხაზეთის ხელისუფლების ან აფხაზური ოპოზიციის მიმართ. ვფიქრობ, ის ხელმძღვანელობს პრინციპით — "რაც უარესი, მით უკეთესი". ამიტომაც გვილოცავს. მას არ აინტერესებს აფხაზური სახელმწიფოს არსებობა. ეს ცხადი და გასაგებია. მე სწორედ ასე მესმის მისი მილოცვა", – განაცხადა ბჟანიამ და გამოეხმაურა ზურაბიშვილის მიერ გამოხატულ სოლიდარობის განცხადებას.

შეგახსენებთ, რომ საქართველოს პრეზიდენტმა 15 ნოემბერს განაცხადა, რომ გმობს რუსეთის მიერ "აჩქარებულ ნაბიჯებს აფხაზეთის ანექსიის მიმართულებით".

"მინდა გამოვეხმაურო მოვლენებს, რაც მიმდინარეობს ოკუპირებულ აფხაზეთში და რუსულ პოლიტიკას. მინდა დავგმო, რომ დღეს რუსეთი დგამს აჩქარებულ ნაბიჯებს ანექსიის მიმართულებით, როცა ითხოვს საქართველოსგან, დათანხმდეს დელიმიტაციაზე, რაც არის წარმოუდგენელი, და რაც პრინციპში, უგულებელყოფს მთელ ლოგიკას ამ მთავრობის "დათმობების" — თითქოს, მათით შეიძლება რუსეთს შეაცვლევინო პოლიტიკა. ამით მხოლოდ ააჩქარებინებ", — განაცხადა ზურაბიშვილმა.

ამასთან, ზურაბიშვილმა აფხაზეთის სამოქალაქო საზოგადოების მიმართაც გამოხატა სოლიდარობა, რომელიც დე ფაქტო ხელისუფლების მიერ რუსული კანონის მიღებას ეწინააღმდეგება.