მაურისიო კატელანის პროვოკაციული ნამუშევარი — სკოჩით კედელზე მიწებებული ბანანი — ნიუ-იორკში გამართულ Sotheby's-ის აუქციონზე $6.2 მილიონად გაიყიდა, სასტარტო ღირებულებაზე ოთხჯერ უფრო ძვირად.

აუქციონის თქმით, ნამუშევარი ჩინელმა კრიპტოვალუტის ანტრეპრენერმა, ჯასტინ სანმა შეიძინა. იტალიელი არტისტის ინსტალაციის შესაძენად მან ექვს სხვა მსურველზე მეტი თანხა გადაიხადა.

"მომდევნო დღეებში ბანანს მე თვითონ შევჭამ, რაც ამ უნიკალური არტისტული გამოცდილების ნაწილი იქნება," — განაცხადა სანმა.

New York Times-ის განცხადებით, ეს ნამუშევარი ადრეც გაიყიდა, თუმცა ახლანდელ ფასთან შედარებით გაცილებით იაფად — $350 000-ად. მაურისიო კატელანის ნამუშევარს მსოფლიოს უძვირესი ხილიც შეგვიძლია დავარქვათ.

კედელზე მიმაგრებული ბანანი კატელანის ნამუშევართა სერიის ნაწილია, რომელსაც "კომიკოსი" ეწოდება. ეს ბანანი საზოგადოებამ თავდაპირველად 2019 წელს იხილა და ხელოვნების ნიმუშს ირონიითა და აგრესიითაც კი შეხვდა. ინსტალაციის მთავარი ფიგურა, ბანანი, რამდენიმე დღეში ერთხელ იცვლება და საამისოდ ინსტრუქციაც მოჰყვება.