იუსტიციის უმაღლესი საბჭოს არამოსამართლე წევრის, ნაზი ჯანეზაშვილის განცხადებით, ხვალ, 17 ივნისს იუსტიციის უმაღლესი საბჭოს მოსამართლის 100-ზე მეტ ვაკანსიასთან დაკავშირებით მიიღებს გადაწყვეტილებას. მისი თქმით, ეს შეეხება იმას, თუ ვინ სად დაინიშნება ან წარედგინება მოსამართლეობის კანდიდატად საქართველოს პარლამენტს.

"მინდა აღვნიშნო, რამდენად მნიშვნელოვანი დღეა ხვალ სასამართლო სისტემაში, დღეისათვის საქართველოში არის, დაახლოებით, 300 მოსამართლე და ხვალ იუსტიციის საბჭო მიიღებს გადაწყვეტილებას, ძალიან მასშტაბურ გადაწყვეტილებას იმასთან დაკავშირებით, თუ ვინ სად დაინიშნება ან წარედგინება მოსამართლეობის კანდიდატად საქართველოს პარლამენტს. დაახლოებით, ჯამში, ყველა ერთად, 100-ზე მეტ ვაკანსიაზე. ეს არის ძალიან მასშტაბური პროცესი, ფაქტობრივად, ამით შეიძლება გადაწყდეს საბოლოოდ — დასკვნით ეტაპზეა ხვალ ფაქტობრივად საბჭო — გადაწყდეს ჩვენი ქვეყნის სასამართლო სისტემის მომავლის ბედი", — განაცხადა ჯანეზაშვილმა ფორმულას ეთერში.

მისივე განცხადებით, ხვალ საბჭო მიიღებს გადაწყვეტილებას 9 უზენაესი სასამართლოს მოსამართლეობის კანდიდატის წარდგენაზე, 88 მათგანის ქვედა ინსტანციაში დანიშვნასა და 8-ის ქვედა ინსტანციაში გადაყვანაზე.