გაფრთხილება: სტატია შეიცავს სპოილერს Game of Thrones-დან.

Game of Thrones-ის მსახიობმა, ემილია კლარკმა, იმ სცენაზე ისაუბრა, რომელსაც სერიალში შეცვლიდა.

ამერიკული მედიაკომპანია theSkimm-ისთვის მიცემულ ინტერვიუში მსახიობი, რომელსაც HBO-ის პოპულარულ ფენტეზი სერიალში დეინერის ტარგარიენის როლის შესრულებით იცნობენ, სხვადასხვა თემას შეეხო. მათ შორის, საყვარელ პოდკასტებს, საკუთარ მიმოწერებსა და მისი ავტორობით შექმნილ კომიქსს, Mother of Madness-ს

შეკითხვაზე, თუ შესაძლებლობის ქონის შემთხვევაში, Game of Thrones-ის რომელ მომენტს შეცვლიდა, კლარკს ბევრი არ უყოყმანია.

"ზუსტად იმ ნაწილს, სადაც მე ვკვდები", — წამოიძახა კლარკმა.

მიუხედავად იმისა, რომ სერიალი ორი წლის წინ დასრულდა, კლარკის ნათქვამი მაინც გულზე მოხვდა ბევრ ფანს, რომლებიც დეინერისის ისტორიის ფინალით, რბილად რომ ვთქვათ, იმედგაცრუებულნი არიან.

პერსონაჟის უკანასკნელ სცენაში, რომელიც სერიალის ერთ-ერთ ყველაზე განხილვად სერიადაც იქცა, დეინერისი თავისმა საყვარელმა და ძმისშვილმა, ჯონ სნოუმ მას შემდეგ მოკლა, რაც უკანასკნელმა დრაკონმა, დროგონმა, მეფის სამფლობელო გადაწვა. ამის შემდეგ დროგონმა რკინის ტახტსაც წაუკიდა ცეცხლი, შემდეგ კი დეინერისის ცხედარი წაიღო.

ფოტო: HBO

2020 წლის ოქტომბერში კლარკმა მაყურებლებს საკუთარი თეორია გაუზიარა, თუ რა მოხდა სიუჟეტში შემდეგ: სავარაუდოდ, დროგონი ფრენას მანამდე განაგრძობდა, სანამ ფრთები ამას შეძლებდნენ.

"ალბათ ცხედართან ერთად იფრენდა, სანამ ის არ გაიხრწნებოდა", — აღნიშნა კლარკმა მაშინ, — "და, მგონია, მანამდე იფრენდა, სანამ მისი ფრთები ამას შეძლებდნენ. მხოლოდ დარდით იქნებოდა მოცული".