ბრიუსელის სამიტის ფარგლებში NATO-ს წევრმა სახელმწიფოებმა ერთობლივი კომუნიკე გაავრცელეს, რომელშიც საქართველოსა და მის წევრობასაც განიხილავენ.

კომუნიკეში ალიანსის წევრი სახელმწიფოები ადასტურებენ, რომ საქართველო გახდება NATO-ს წევრი.

"ჩვენ ვადასტურებთ გადაწყვეტილებას, რომელიც მიღებულ იქნა 2008 წელს ბუქარესტის სამიტზე იმის შესახებ, რომ საქართველო გახდება ალიანსის წევრი გაწევრიანების სამოქმედო გეგმასთან (MAP) ერთად, როგორც პროცესის განუყოფელი ნაწილი. ჩვენ ვადასტურებთ ამ გადაწყვეტილების ყველა ელემენტს, ამასთან, შემდგომ გადაწყვეტილებებსა, მათ შორის იმას, რომ ყველა პარტნიორი შეფასდება საკუთარი დამსახურების მიხედვით. ჩვენ მტკიცედ ვუჭერთ მხარს საქართველოს უფლებას დამოუკიდებლად გადაწყვიტოს საკუთარი მომავალი და საგარეო კურსი საგარეო ჩარევის გარეშე", — ნათქვამია კომუნიკეში.

კომუნიკეში საუბარია პოლიტიკურ შეთანხმებაზეც, რომელსაც მმართველმა პარტიამ და ოპოზიციამ მიაღწიეს და ყველა მხარეს მისი შესრულებისკენ მოუწოდებენ.

"ჩვენ მზად ვართ NATO-საქართველოს კომისია და ყოველწლიური ეროვნული პროგრამა პოლიტიკური დიალოგისა და თანამშრომლობის გაღრმავების მიზნით სრულად გამოვიყენოთ. მივესალმებით მნიშვნელოვან პროგრესს რეფორმებში, რომელიც საქართველომ განახორციელა და რომელიც უნდა გაგრძელდეს. ეს საქართველოს ალიანსთან თავდაცვისუნარიანობის განმტკიცებაში დაეხმარება. საქართველოს ურთიერთობა ალიანსთან საბოლოო წევრობის მომზადების ყველა პრაქტიკულ ინსტრუმენტს მოიცავს. ჩვენ მჭიდროდ ვთანამშრომლობთ საქართველოსთან შავი ზღვის რეგიონში უსაფრთხოების საკითხებზე, რუსეთის მზარდი დესტაბილიზაციის აქტივობების საპასუხოდ და განახლებული არსებითი NATO-საქართველოს პაკეტის განსახორციელებლად გადადგმულ ნაბიჯებს მივესალმებით. მზად ვართ ჩვენი მხარდაჭერა საქართველოსთვის გავზარდოთ, მათ შორის ჰიბრიდული საფრთხეების წინააღმდეგობის გამყარების, ტრენინგებისა, წვრთნების და უსაფრთხო კომუნიკაციების სფეროში. NATO-საქართველოს მორიგ სწავლებას 2022 წელს ველით", — ვკითხულობთ კომუნიკეში.

14 ივნისს ბრიუსელში NATO-ს სამიტი იმართება. წლევანდელ სამიტზე პარტნიორი ქვეყნები მიპატიჟებულნი არ იყვნენ და მხოლო წევრმა სახელმწიფოებმა მიიღეს მონაწილეობა.

სამიტის ფარგლებში გაიმართა 14-18 ივნისს ბრიუსელის ფორუმი გაიმართება, რომელშიც საქართველოს იღებდ მონაწილეობას. საქართველოს მთავრობის ადმინისტრაციის განცხადებით, პრემიერმინისტრი ირაკლი ღარიბაშვილი სხვა მსოფლიოს ლიდერებთან ერთად ფორუმის წამყვან სპიკერად დასახელდა.

ბრიუსელის ფორუმი თემატური პანელებისგან შედგება. ირაკლი ღარიბაშვილი სიტყვით გამოვიდა პანელზე, სახელწოდებით Investing in Resilience, რომლის ფარგლებშიც ყურადღება გამახვილდა NATO-ს მოკავშირეებს შორის მდგრადობის ინტეგრირებულ და კოორდინირებულ მიდგომაში ინვესტირების მნიშვნელობაზე.