საქართველოს შინაგან საქმეთა სამინისტრომ შიდა ქართლში, სოფელ ხოვლესთან ტყეში ტყის მცველის მკვლელობის ბრალდებით ერთი პირი დააკავა. ამის შესახებ On.ge-ს შსს-ს პრესამსახურში რამდენიმე წუთის წინ განუცხადეს.

უწყება საქმეს სისხლის სამართლის კოდექსის 108-ე მუხლით იძიებს. ამ მუხლით, განზრახ მკვლელობა ისჯება თავისუფლების აღკვეთით ვადით შვიდიდან თხუთმეტ წლამდე.

50 წლამდე ტყის მცველი სახლიდან 25 თებერვალს გავიდა, ოჯახის წევრებმა კი სამართალდამცავებს მას შემდეგ მიმართეს, რაც მისი კუთვნილი ცხენი სოფელში მარტო დაბრუნდა და სატელეფონო კავშირი ვეღარ დაამყარეს.

შინაგან საქმეთა სამინისტრო გამოძიებას სისხლის სამართლის კოდექსის 116-ე მუხლით ატარებდა. ამ მუხლით, დამნაშავეს სისხლისსამართლებრივი პასუხისმგებლობა სიცოცხლის გაუფრთხილებლობისთვის ეკისრება.