მოსკოვის სასამართლომ ოპოზიციონერ ალექსეი ნავალნის სტრუქტურები ექსტრემისტულ ორგანიზაციებად მიიჩნია. ეს შეეხება კორუფციასთან ბრძოლის ფონდს, მოქალაქეთა უფლებების დაცვის ფონდსა და შტაბებს.

სასამართლოს გადაწყვეტილების საფუძველზე მათ, ვინც მხარს უჭერდა და მონაწილეობდა პროექტების მუშაობაში, შესაძლოა არჩევნებში მონაწილეობა აუკრძალონ. ნავალნის მომხრეებს გადაწყვეტილების გასაჩივრება შეუძლიათ, თუმცა ორგანიზაციებისა და შტაბების მუშაობა დაუყოვნებლივ უნდა შეაჩერონ.

"როცა კორუფცია სახელისუფლებო მმართველობის საფუძველია, კორუფციასთან მებრძოლები — ექსტრემისტები", — ასე გამოეხმაურა ალექსეი ნავალნის სასამართლოს განჩინებას.

ნავალნის ორგანიზაციების ექსტრემისტულად გამოცხადებისთვის პროკურატურამ მოსკოვის სასამართლოს 16 აპრილს მიმართა. სხდომები დახურულ კარს მიღმა მიმდინარეობდა, რადგან უწყებამ დოკუმენტების ნაწილს გრიფიტ საიდუმლო დაადო.

ივნისში ვლადიმერ პუტინმა ხელი მოაწერა კანონს, რომელიც ტერორისტულ ან ექსტრემისტულ ორგანიზაციებთან კავშირში მყოფ პირებს არჩევნებში კენჭისყრის უფლებას დროებით უზღუდავს. ამასთან, ჩართულობად შეიძლება ჩაითვალოს როგორც ამ სტრუქტურებში პირდაპირი მუშაობა, ისე მათი მხარდაჭერა სოცქსელებში.

კანონი ითვალისწინებს, რომ კრძალულად მიჩნეული ორგანიზაციების ხელმძღვანელებმა და თანამშრომლებმა კენჭი ვერ იყარონ როგორც სახელმწიფო დუმაში, ისე გუბენრატორების პოსტებსა და ადგილობრივ საკანონმდებლო ორგანოებში.