პარლამენტში უპირბადოდ ყოფნის გამო დაჯარიმებას დეპუტატები, თეონა აქუბარდია და ხათუნა სამნიძეც ითხოვენ. ასე ეხმაურებიან ისინი, პარლამენტის წევრის, ტარიელ ნაკაიძის შინაგან საქმეთა სამინისტროსთვის მისი დაჯარიმების შესახებ მოწოდებას.

"ტარიელ ვუერთდები პათოსს მეც. კი ვართ მე და ხათუნა ორჯერ აცრილი, მაგრამ რახან არ არის ჯერ ეს რეგულაცია და 10 წუთით მოვიხსენიოთ პირბადე ამოსასუნთქად, წესი წესია", — წერს აქუბარდია.

8 ივნისს პლენარულ სხდომაზე უპირბადოდ დასწრების გამო პარლამენტის დეპუტატმა, ტარიელ ნაკაიძემ საკუთარი თავის დაჯარიმება მოითხოვა. ამავე დღეს მე-10 მოწვევის პარლამენტის პლენარული სხდომა მიმდინარეობდა, რასაც დეპუტატების დიდი ნაწილი პირბადის გარეშე ესწრებოდა. აღნიშნულის ამსახველი ფოტოები თავდაპირველად რადიო თავისუფლებამ გამოაქვეყნა.