ექსპრემიერის, გიორგი გახარიას განცხადებით, ჰიდროელექტროსადგურები უნდა აშენდეს, მაგრამ იმ ფორმით, როგორც ნამახვანში ხდება, "არ გამოვა". ამის შესახებ მან TV პირველის ეთერში ისაუბრა და თქვა, რომ უმაღლესი თანამდებობების პირები პირადად უნდა ჩაერთონ მოქალაქეებთან კომუნიკაციის პროცესში.

"რა თქმა უნდა, ქვეყნის ენერგოდამოუკიდებლობა არის უკიდურესად მნიშვნელოვანი. ყველას უნდა გევსმოდეს, რომ ჩვენი ენერგოსისტემის საფუძველი არის ჰიდროენერგია. რა თქმა უნდა, ჩვენ ჰიდროელექტროსადგურები უნდა ავაშენოთ, მაგრამ იმ გზით და ფორმით, როგორც ახლა ეს ხდება ნამახვანში — სამწუხაროდ, მე მგონია, რომ აქ მთავრობა და ხელისუფლება შეცდომას უშვებენ — არ გამოვა, ვერ აშენდება ასე ეს ჰესი.

მე მაქვს გამოცდილება მსგავს წინააღმდეგობებთან მუშაობის და თუ ქვეყნის უმაღლესი თანამდებობების პირები, იმიტომ რომ ეს სიტუაცია ასე გამწვავდა, პირადად არ ჩაერთვებიან და ამ ადამიანებს პირადად არ დაელაპარაკებიან, არ გამოვა ეს საქმე. მიუხედავად იმისა, რომ ქვეყნის ეკონომიკას და ენერგეტიკას ნამახვანი სჭირდება, ადამიანების, რიონის ხეობის დამცველების მხარდაჭერის გარეშე არ გამოვა ასე", — თქვა მან.

ნამახვანჰესის წინააღმდეგ აქციები უწყვეტად მიმდინარეობს. 26 მაისს, გვიან ღამით ნამახვანჰესის მოწინააღმდეგე აქტივისტები გუმათში ჩავიდნენ და კომპანია ენკას მანქანებისთვის ხეობის შესასვლელი გადაკეტეს. ისინი აბრახუნებდნენ რკინის ჯებირზე, რომელიც პოლიციამ გზის გადასაკეტად აღმართა. გუმათჰესთან მთელი ღამის განმავლობაში მობილიზებული იყო პოლიციაც.

შინაგან საქმეთა სამინისტრომ 27 მაისს განაცხადა, რომ ბარიკადების დაზიანებაზე გამოძიება დაიწყეს. აქტვისიტებმა კი აღნიშნეს, რომ ხმაური გაგრძელდება იქამდე, სანამ მოთხოვნები არ შესრულდება.

27 მაისს გუმათში რიონის ხეობაში სიტუაცია მას შემდეგ დაიძაბა, რაც აქციის მონაწილეების ნაწილმა რკინის ჯებირებზე ბრახუნი დაიწყო, ნაწილმა კი სცადა ჯებირებზე მიწოლა. უკან დახევაზე ორგანიზატორების მოწოდების მიუხედავად, ყველას გაკონტროლება ვერ მოხერხდა და სიტუაცია დაიძაბა. დაპირისპირებისას 8 პირი დააკავეს ადმინისტრაციულ სამართალდარღვევათა კოდექსით გათვალისწინებული კანონდარღვევისთვის.