რამდენიმე კვირის წინ 8 წლის ბრაისონის ლეკვი — 4 თვის ბრიუსი ავად გახდა. ბავშვმა მშობლების საუბარს ყური მოკრა და გაიგო, რომ ძაღლს ძვირადღირებული მკურნალობა და მედიკამენტები ესაჭიროებოდა. ბრაისონმა გადაწყვიტა, რომ ერთგული ოთხფეხა მეგობრის გადასარჩენად რაღაც თავადაც აუცილებლად უნდა ეღონა. ბრაისონმა მისთვის ყველაზე ძვირფასი პოკემონის ბარათების კოლექციის გაყიდვა გადაწყვიტა.

ფოტო: Kimberly Woodruff

"ბრიუსი ავად გახდა და ჩემი დახმარება სჭირდებოდა. ძალიან სევდიანი ვიყავი. არ მინდოდა, რომ ჩემი საუკეთესო მეგობარი დამეკარგა", — ამბობს ბრაისონი.

მიუხედავად იმისა, რომ მშობლები ბრიუსის გადასარჩენად თანხის შეგროვებას შეპირდნენ და სთხოვეს, კოლექცია არ გაეყიდა, ბრაისონი უკან დახევას არ აპირებდა. მან სახლის წინ პატარა დახლი მოაწყო და მყიდველებს შეატყობინა, რომ წლების განმავლობაში შეგროვებულ ასობით ბარათის ლეკვის გადასარჩენად ყიდდა.

ფოტო: Kimberly Woodruff

ბრაისონის დედამ შვილის დასახმარებლად დახლის ფოტო სამეზობლოს ფეისბუქ ჯგუფში დადო. თავიდან ეგონა, რომ ამ პატარა წამოწყებას ყურადღებას არავინ მიაქცევდა, თუმცა შეცდა. პატარა ბრაისონის დახლს მეზობლები მოაწყდნენ. ზოგი ბარათს ყიდულობდა, ზოგს ბარათები მოჰქონდა, სხვები კი ბრაისონს ფულითა და ძაღლის საჭმლით ეხმარებოდა. საზოგადოების ამგვარი აქტიურობის შემდეგ ბრაისონის დედამ საქველმოქმედო პლატფორმა GoFundMe-ზე ანგარიშის გახსნა გადაწყვიტა. ანგარიშზე $15 000-მდეა შეგროვებული.

საბედნიეროდ, ბრიუსი უკვე მოსიყვარულე ოჯახს დაუბრუნდა და თავს კარგად გრძნობს. შეგროვებული თანხით ოჯახმა ბრიუსის გარდა, კიდევ სამი ცხოველის მკურნალობა დააფინანსა. თანხის ნაწილი კი ძაღლთა თავშესაფარს გადაურიცხა.

ეს გულისამაჩუყებელი ამბავი სამეზობლოს მალე გასცდა და ბრაისონის სიმამაცის შესახებ კომპანია Pokémon Co.-მაც გაიგო. კომპანიამ ბიჭს გაყიდული ბარათების სანაცვლოდ, იშვიათი ბარათებით სავსე ამანათი გამოუგზავნა.