ორგანიზაციაში, სამართლიანი არჩევნები (ISFED), აცხადებენ, რომ სამწუხაროა საპატრიარქოს სურვილი, გაასაჩივროს ნინოწმინდის ბავშვთა პანსიონიდან ბენეფიციარების გაყვანის შესახებ სასამართლოს გადაწყვეტილება.

"სასამართლოს განჩინებაში აღნიშნულია ის საფრთხე, რომელიც დაწესებულებაში ბავშვის უფლებათა დაცვის კუთხით არსებობს და სახელმწიფო უწყებებისგან დროულ ჩარევას მოითხოვს. მართალია, განჩინება შეზღუდული შესაძლებლობის მქონე ბავშვებს ეხება, მაგრამ სასამართლომ საფრთხის შემცველად შეაფასა პანსიონში არსებული ზოგადი მდგომარეობა.

აგრეთვე, სახალხო დამცველის შეფასებით, პანსიონში არსებული მდგომარეობა არ შეესაბამება არასრულწლოვანთა ინტერესებს და არსებულ სტანდარტებს, და, ასევე, საფრთხის შემცველია ბავშვებისთვის ძალადობისგან დაცვის, სრულფასოვანი განვითარების, სოციალიზაციისა და დამოუკიდებელი ცხოვრებისთვის მომზადების კუთხით. ამ ფონზე, განსაკუთრებით, სამწუხაროა, საპატრიარქოს მიერ განჩინების გასაჩივრების შესახებ გადაწყვეტილების მიღება", — აცხადებენ ორგანიზაციაში.

სამართლიანი არჩევნები მოუწოდებს საპატრიარქოსა და პანსიონის ადმინისტრაციას დაუყოვნებლივ შეუშვას სახალხო დამცველის წარმომადგენლები დაწესებულებაში; შეწყვიტოს ბავშვთა საუკეთესო ინტერესის უგულებელყოფა, მათი სტრესულ მდგომარეობაში ჩაყენება და ამის ამსახველი ვიდეოების გასაჯაროება; ასევე, შეწყვიტოს ბავშვების გაყვანის პროცესის ხელშეშლა;

ორგანიზაციის მოწოდება მიმართება სახელმწიფოსაც, რომ უარი თქვას ამგვარი დაწესებულებებზე და დაუყოვნებლივ დაიწყოს პანსიონში მყოფი ყველა ბავშვის ბიოლოგიურ ოჯახში დაბრუნების ან მინდობით აღზრდაში გადაყვანის პროცესი, თუ ეს დროულად ვერ ხერხდება, პრიორიტეტი მიანიჭოს მცირე, საოჯახო ტიპის სახლებს.

დღეს, 6 ივნისს საპატრიარქოში განაცხადეს, რომ გაასაჩივრებენ სასამართლოს გადაწყვეტილებას ნინოწმინდის პანსიონიდან ბენეფიციართა გამოყვანის შესახებ. საპატრიარქო მიიჩნევს, რომ სასამართლოზე წარმოდგენილი არ ყოფილა შესაბამისი მტკიცებულებები პანსიონში მყოფ არასრულწლოვნებზე უღირსი მოპყრობის და ძალადობის შესახებ.

გუშინ, 5 ივნისს თბილისის საქალაქო სასამართლოს მოსამართლემ, ივანე ღლონტმა დააკმაყოფილა ორგანიზაცია პარტნიორობა ადამიანის უფლებებისთვის (PHR) მოთხოვნა პანსიონიდან შშმ ბავშვების გაყვანის შესახებ. PHR-მა სასამართლოს სწორედ შშმ ბავშვების სპეციალური მოსარჩელის სტატუსით მიმართა, თუმცა, ორგანიზაციაში განმარტავენ, რომ მიღებული გადაწყვეტილება უნდა გახდეს პანსიონიდან ყველა ბავშვის გამოყვანის საფუძველი.

"არ შეიძლება, რომელიმე ბავშვი დავტოვოთ საფრთხეში, მიუხედავად იმისა, რომ ჩვენი კანონმდებლობით ჩვენ მხოლოდ შშმ ბავშვების უფლებების დაცვა შეგვიძლია სპეციალური მოსარჩელის სტატუსით", — განაცხადა PHR-ის აღმასრულებელმა დირექტორმა, ანა არგანაშვილმა.

გაიგე მეტი სასამართლოს გადაწყვეტილებაზე:

• რა გადაწყვეტილება მიიღო სასამართლომ პანსიონიდან ბავშვების გაყვანაზე — მარტივად