სტრატეგია აღმაშენებლის ლიდერმა, გიორგი ვაშაძემ პარლამენტში დაარეგისტრირა კანონპროექტი, რომელიც რექტორს ნასამართლეობის შემთხვევაში რექტორის თანამდებობაზე ყოფნას უკრძალავს. ასევე, პარტიის მიერ ინიცირებული კანონპროექტის თანახმად, რექტორის არჩევა პირდაპირი წესით უნდა მოხდეს.

"ქვეყანაში არის ძალიან დიდი პრობლემა ამ კუთხით. არ შეიძლება უმაღლესი სასწავლებლები იყოს, ასე ვთქვათ, საპენსიო ნავსაყუდელი პოლიტიკური მიზნებისთვის და არ იყოს ამაზე ყურადღება მიქცეული. ამ კანონპროექტის დარეგისტრირებით ჩვენ ვასრულებთ ჩვენს დაპირებას ახალგაზრდებზე. მარტივი მოთხოვნაა, არ უნდა იყოს ნასამართლევი უმაღლესი სასწავლებლის რექტორი და მეორე უმაღლესი სასწავლებლის რექტორები უნდა ირჩეოდნენ პირდაპირი წესით, ფარული კენჭისყრით, უნდა ირჩევდნენ პროფესორ-მასწავლებლები", — განაცხადა გიორგი ვაშაძემ.

მან საკანონმდებლო ორგანოში აღნიშნული კანონპროექტი იმ სტუდენტების თანდასწრებით დაარეგისტრირა, რომლებიც საქართველოს ტექნიკური უნივერსიტეტის რექტორის გადადგომის მოთხოვნით აქციებს მართავდნენ. სტუდენტები მიზეზად იმას ასახელებენ, რომ რექტორი ნასამართლევია.

თავად რექტორი, დავით გურგენიძე აცხადებს, ყველა ნასამართლეობა გაქარწყლებულია და რამდენიმე მუხლში უკვე გამართლებულია.