განათლების სამინისტროსთან საქართველოს ტექნიკური უნივერსიტეტის რექტორის გადადგომის მოთხოვნით სტუდენტებმა აქცია გამართეს. სტუდენტები მიზეზად იმას ასახელებენ, რომ რექტორი ნასამართლევია. ისინი განათლების მინისტრთან შეხვედრას ითხოვენ. მათი თქმით, განათლების სამინისტროსთან რამდენიმე დღეა შიმშილობენ და ამბობენ, რომ მინისტრი ამ დრომდე არ შეხვედრიათ.

გარდა ამისა, სტუდენტები ამბობენ, რომ განათლების სამინისტროს შენობაში შესვლისა და საპირფარეშოთი სარგებლობის უფლება მოშიმშილეებსაც არ მისცეს.

"როგორ შეიძლება საქართველოს ტექნიკურ უნივერსიტეტს რაოდენობრივადაც, ისტორიულადაც ყველაზე დიდ უნივერსიტეტს მართავდეს კრიმინალი, თანაც რეციდივისტი... ეს არის სირცხვილი და არ ვაპირებთ ამაზე შეგუებას. ამას ვაპროტესტებთ და გავაგრძელებთ ბოლომდე, მათ შორის უმძიმესი ფორმა შიმშილობით", — ამბობს სტუდენტი, ლაშა დიაროვი.

აქციაზე მივიდა სტრატეგია აღმაშენებლის ლიდერი, გიორგი ვაშაძე. როგორც მან აღნიშნა, ის აქციაზე სტუდენტების მიიწვიეს.

"მთხოვეს ინიციატივა დავაყენო, რათა უნივერსიტეტის რექტორი არ იყოს ნასამართლევი. ამას ნორმალურ ქვეყანაში არანაირი ინიციატივა არ სჭირდება", — აღნიშნა ვაშაძემ.

განათლების უწყებაში On.ge-ს განუცხადეს, რომ აქციის მონაწილეებს სამინისტროს წარმომადგენელთან შეხვედრა შესთავაზეს, რასაც სტუდენტები არ დათანხმდნენ.

რაც შეეხება სამინისტროს საპირფარეშოთი სარგებლობას, უწყებაში გვითხრეს, რომ პანდემიიდან გამომდინარე შენობაში უცხო პირთა შესვლა აკრძალულია.

თავად რექტორი, დავით გურგენიძე აცხადებს, ყველა ნასამართლეობა გაქარწყლებულია და რამდენიმე მუხლში უკვე გამართლებულია.