ახალი კარავი ნამახვანჰესის მშენებლობის მოწინააღმდეგეებმა სოფელ სორმონთან გაშალეს. აქციის ორგანიზატორები ვარაუდობენ, რომ კომპანია ნამახვანში ტექნიკის შეყვანას სწორედ ამ გზით შეეცდება.

"ვნახეთ, რომ კომპანიამ ალტერნატიული გზა გამოძებნა და ახლა სადაც ჩვენ ვდგავართ აქ ხდებოდა პიკაპებით გადაადგილება ხეობის მიმართულებით. ეს არის მწვანეყვავილადან გასასვლელი გზა ხეობაში უშუალოდ და გადავკეტეთ ახლა აქაც. აღსანიშნავია ისიც, რომ აქაურმა მცხოვრებლებმა გამოთქვეს სურვილი იმის, რომ თვითონ მიიღებდნენ გზის ამ ნაწილის დაკეტვაში მონაწილეობას. ის, რომ ლეგიტიმაცია მივცეთ ამ ადგილს, როგორც ერთ-ერთ ჩვენს ლოკაციას, მოვედით აქ და ვშლით კარავს", — განაცხადა ნამახვანჰესის საწინააღმდეგო პროტესტის ერთ-ერთმა ლიდერმა, ვარლამ გოლეთიანმა.

გუმათჰესთან კი, ამ დრომდე პოლიციაა განლაგებული. სამართალდამცავები ადგილზე მას შემდეგ არიან, რაც სოფელ ნამოხვანში ხეობის აქტივისტებს კარვები დაუშალეს და იქ დაბრუნების საშუალებას არ აძლევენ. რკინის ბარიკადებში მხოლოდ ადგილობრივ მოსახლეობას ატარებენ, თუმცა აქციის მონაწილეებს სახლში წასასვლელად შემოვლითი გზის გამოყენება უწევთ. ბარიკადებს პოლიცია ამაგრებს, რომელთა რაოდენობაც საღამოობით იზრდება.

მას შემდეგ, 26 მაისს რაც ხეობის აქტივისტები თბილისში გამართული აქციებიდან გუმათში დაბრუნდნენ, ისინი ყოველ ღამე ბარიკადებზე აბრახუნებენ და ხმაურობენ.

27 მაისს შინაგან საქმეთა სამინისტრომ განაცხადა, რომ რკინის ბარიკადებზე ქვებს ურტყამდნენ, რის გამოც ისინი დაზიანდა და საქმეზე გამოძიება დაიწყეს. აქტვისიტები კი აღნიშნავენ, რომ ხმაური გაგრძელდება იქამდე, სანამ მოთხოვნები არ შესრულდება.