საქართველოს სახალხო დამცველმა სადაზღვევო კომპანია იმედი L-ის მხრიდან სიმსუქნის დიაგნოზის მქონე დაზღვეულის მიმართ ჭარბწონიანობის ნიშნით ირიბი დისკრიმინაცია დაადგინა.

როგორც სახალხო დამცველი აღნიშნავს, სადაზღვევო კომპანია საგამონაკლისო შემთხვევას — "წონის კორექციასთან დაკავშირებულ ხარჯებს" აიგივებს სიმსუქნის დიაგნოზთან, რომლის წინაპირობასაც ჭარბწონიანობა წარმოადგენს. შედეგად, ჭარბწონიანობიდან გამომდინარე სიმსუქნის დიაგნოზის მქონე პაციენტები ვერ სარგებლობენ იმ გამოკვლევებისა და მანიპულაციების ანაზღაურების უფლებით, რომლებიც აღნიშნული პრობლემისა და შესაბამისი დიაგნოზის არარსებობის შემთხვევაში აუნაზღაურდებოდათ. სახალხო დამცველმა დაადგინა, რომ კომპანიის პრაქტიკა არახელსაყრელ მდგომარეობაში აყენებს ჭარბწონიან პაციენტებს და უზღუდავს მათ სამედიცინო სერვისებზე ხელმისაწვდომობის უფლებას.

სახალხო დამცველმა რეკომენდაციით მიმართა სადაზღვევო კომპანია იმედი L-ის გენერალურ დირექტორს, რომ მომხმარებლებთან გაფორმებულ ხელშეკრულებებში წონის კორექციასთან დაკავშირებული საგამონაკლისო შემთხვევის ფორმულირება მოხდეს იმგვარად, რომ შეესაბამებოდეს ბრძანებით დამტკიცებული ჭარბი წონისა და სიმსუქნის მართვის პროტოკოლს. ხოლო, იმ დაზღვეულებთან მიმართებით, რომლებთანაც, დღეის მდგომარეობით, უკვე გაფორმებულია ხელშეკრულებები, "წონის კორექციასთან დაკავშირებული ხარჯების" განმარტება და პრაქტიკაში აღსრულება მოხდეს ჭარბი წონისა და სიმსუქნის მართვის პროტოკოლის შესაბამისად. ასევე, სახალხო დამცველმა მოუწოდა სსიპ საქართველოს დაზღვევის სახელმწიფო ზედამხედველობის სამსახურის უფროსს, წინამდებარე რეკომენდაცია გაუზიაროს საქართველოში მოქმედ სადაზღვევო კომპანიებს.