ევროპელი სოციალისტების დეპუტატის აზრით, სჯობს ამნისტიის კანონპროექტი მოიხსნას დღის წესრიგიდან. მისი თქმით, ეს უფრო მისაღები ვარიანტი იქნებოდა და ყველა დამშვიდდებოდა.

"რამდენჯერ იყო გადაცდომები, არ მინდა ვთქვა, დარბევები და მრავლი სხვა, ჩახოცვები და მიცვალებულებს პოულობდნენ სადღაც და სადღაც. ისიც გვახსოვს ჩვენ და მახსოვს კარგად, რომ არცერთი ამ დარბევის შემდეგ ამნისტია არ ყოფილა.

ეს ამნისტია ჰუმანური აქტია და, რა თქმა უნდა, ჩვენ მხარს დავუჭერთ ყველანაირ ამნისტიას, რომელიც იქნება მიმართული სტაბილიზაციისკენ, ურთიერთგაგებისკენ და იმისკენ, რომ კალაპოტში ჩადგეს ქვეყანაში მიმდინარე პროცესები. ხომ არ აჯობებდა, რომ ეს საკითხი საერთოდ მოგვეხსნა დღის წესრიგიდან და გაგვეგრძელებინა ის საქმიანობა, რაც საჭიროა ქვეყნისთვის?" — განაცხადა მან პარლამენტის პლენარულ სხდომაზე, სადაც ამნისტიის კანონპროექტებს განიხილავენ.

დღეს, 27 მაისს პარლამენტი ქართული ოცნების ინიცირებულ ამნისტიის კანონპროექტს განიხილავს, რომელიც 2 პროექტს აერთიანებს. ანრი ოხანაშვილის განცხადებით, ერთი ეხება 20-21 ივნისის მოვლენების სისხლისამართლებრივ ამნისტიას, ხოლო მეორე ადმინისტრაციული სახდელისგან გათავისუფლებას.

ქართული ოცნება და ოპოზიცია სამუშაო შეხვედრაზე ამნისტიის კანონპროექტზე ვერ შეთანხმდნენ. ქართული ოცნების დეპუტატი, ანრი ოხანაშვილი ვერ შეთხმებას ოპოზიციის წარმომადგენლებს შორის შეუთანხმებლობას, კერძოდ, კი პარტია ლელოს პოზიციას უკავშირებს. ოხანაშვილის თქმით, ლელოს წარმომადგენლები ისეთ კატეგორიულ საკითხებსა და მოთხოვნებს აყენებენ, რომელიც შარლ მიშელის დოკუმენტში გაწერილ ამნისტიის კანონის არსს პირდაპირ არღვევს.

გირჩის ერთ-ერთი ლიდერი, იაგო ხვიჩია ამბობს, რომ ოპოზიციის ვერსია მშელის დოკუმენტს ეწინააღმდეგება და მისი თქმით, ის ოპოზიციის ვერსიას მხარს არ დაუჭერს.

პარლამენტში ამნისტიის შესახებ ორი კანონპროექტია დარეგისტრირებული — ერთი ოპოზიციის და ერთიც მმართველი პარტიის.

20 ივნისთან დაკავშირებულ საქმეებზე ამნისტიის მიღება ევროპული საბჭოს პრეზიდენტის, შარლ მიშელის ინიციატივით შემქნილი დოკუმენტის ერთ-ერთი პუნქტი იყო.