პარლამენტის წევრი, სალომე სამადაშვილი ქართული ოცნების დეპუტატებს მიმართავს, მათი აზრით, როგორ საქართველოში სურდათ ცხოვრება წინაპრებს, რომლებისთვისაც დამოუკიდებლობა სანუკვარი ოცნება იყო.

"ხვალ 26 მაისს რომ აღვნიშნავთ, თქვენი აზრით, ჩვენს წინაპრებს, რომლებისთვისაც სანუკვარი ოცნება იყო მართლაც დამოუკიდებელი სახელმწიფო, რომელიც ევროპის ნაწილი იქნებოდა. ამ ხალხს როგორ წარმოედგინა ჩვენი სახელმწიფო, საქართველოდ ქართველების გარეშე? უნდა გაიქცეს ამ ქვეყნიდან ყველა, ვისაც გადარჩენა უნდა თუ არ არის ქართულ ოცნებასთან დაკავშირებული და შესაბამისად, დასაქმებული ბიუჯეტის ხარჯზე?", — განაცხადა სამადაშვილმა.

პარლამენტში სიტყვით გამოსვლისას მან თქვა ისიც, რომ ქართული ოცნების დეპუტატები განცხადებებში საუბრობენ ისეთ ქვეყანაზე, რომელიც მისთვის წარმოსახვითი სახელმწიფოა.

"მეორე, მესამე კვირაა აქ ვსხედვართ და მგონია, რომ რაღაც პარალელურ სამყაროში ცხოვრობთ, ძვირფასო კოლეგებო და არ იცით, რა ხდება ქუჩაში, არ იცით, სად ცხოვრობს ჩვენი ხალხი, არ იცით, რა პრობლემებია ამ ადამიანების წინაშე და ამაში ყოველდღიურად ვრწმუნდები, როდესაც ვისმენ ამ დარბაზში თქვენს ოდიოზურ სადღეგრძელოებს, რომელიც შეურაცხმყოფელია ჩვენი მოქალაქეებისთვის", — თქვა მან.

დეპუტატმა აღნიშნა, რომ დღეს ქვეყანაში ორი საქართველოა — ერთი ქართული ოცნება და მეორე ის, სადაც ცხოვრობენ მოქალაქეები. მისი თქმით, ამ ორ ქვეყანაში სრულიად სხვადასხვა რამ ხდება.

"ის საქართველო, რაც არის ჭიათურაში, ბორჯომში, საქართველო, რომელიც იბრძვის გადარჩენისთვის, ის ჩვენი თანამოქალაქეები, რომლებიც ჩამოვიდნენ თბილისში, რადგან ვერ გაიგეს პასუხი ვერცერთ შეკითხვაზე, რომელიც უკავშირდება ჰესის მშენებლობას და დასცინის თქვენი პრემიერმინისტრი და ბნელებს ეძახის, იმის ნაცვლად, რომ პასუხი გასცეს მათ შეკითხვებს, თქვენგან, აქ რომ სხედხართ, ითხოვს პასუხს და ეს პასუხები უნდა ისმოდეს პარლამენტში", — თქვა დეპუტატმა.

სამადაშვილი დაინტერესდა, რატომ არ იწვევს შესაბამისი კომიტეტი ეკონომიკისა და გარემოს დაცვის მინისტრებს და რატომ არ პასუხობს კითხვებს, რომლებიც მოსახლეობას ლეგიტიმურად აქვს.

"რას აკეთებთ აქ და რისთვის გიხდით ქართველი ხალხი ხელფასს?!", — მიმართა მან დეპუტატებს.

სამადაშვილმა ისაუბრა დასაქმების სააგენტოს ხარჯებზეც და აღნიშნა, რომ ამის მიუხედავად, უწყება ვერ იცლის იმ ხალხისთვის, რომელიც ხელისუფლებამ "მონური შრომისთვის" ევროპაში "გაისტუმრა".

"მონური შრომისთვის რომ გაუშვით ხალხი და ყურადღებას რომ არ აქცევთ და ადამიანებად არ თვლით, თქვენი საკონსულო სამსახურით დაწყებული და დასაქმების სააგენტოთი დამთავრებული, რომელიც საქართველოს მოქალაქეების ჯიბიდან ხარჯავენ ასობით მილიონს და რაში, არავინ იცის. არ მესმის, რატომ არ გაინტერესებთ, რომ მოიწვიოთ საგარეო საქმეთა სამინისტრო და დასაქმების ეროვნული სააგენტო და გაიგოთ, ეს ხალხი გაჭირვებაში რომ არის გერმანიაში ჩავარდნილი, ვინ არის მათი პატრონი, ისინი არ არიან თქვენი თანამოქალაქეები?", — თქვა სამადაშვილმა.