ნამახვანჰესის საპროტესტო აქციის ორგანიზატორმა, ვარლამ გოლეთიანმა დღეს მომხდარი ინციდენტის შეფასებისას დაპირისპირების მიზეზად ლგბტ სამკლაური წარმოაჩინა და არა აგრესიული ჯგუფები. მან ზოგადად ძალადობა და იქ მომხდარი დაპირისპირება დაგმო, თუმცა განაცხადა, რომ "გამომწვევი მიზეზი" შეიძლება სიმბოლიკა გახდეს.

გოლეთიანის თქმით, აქციაზე სახელმწიფო სიმბოლიკის გარდა არავინ უნდა მივიდეს და ეს იქნება "დაპირისპირების პრევენცია".

"გუშინაც მომხდარა რაღაც და დღესაც ქონდა გარკვეულ პროვოკაციას ადგილი და მკაფიოდ გვინდა ჩვენი პოზიცია დავაფიქსიროთ ამაზე. ჩვენი მოძრაობა ემიჯნება ყოველგვარ ძალადობას და საერთოდ ჩვენი გაცხადებული პოზიციაა, რომ მშვიდობიანი უნდა იყოს ჩვენი პროტესტი ყველა ეტაპზე. თქვენ იცით, რომ ჩვენი სახალხო მოძრაობა აერთანებს ყველა ადამიანს და ყველა მოქალაქეს და ყველას აქვს უფლება იმისი, რომ თავის მოქალაქეობრივ ფარგლებში გამოხატოს პროტესტი აქ და სხვა შეკრებებზე და სხვა მოედანზე. ამიტომ, ის დაპირისპირებები რაც აქ ხდება, ბუნებრივია, ვემიჯნებით.

აქვე გვინდა მკაფიოდ ვთქვათ, რომ რა არის ახლა ამ ძალადობის და ამ დაპირისპირების გამომწვევი მიზეზები ხომ. ეს შეიძლება გახდეს გარკვეული სიმბოლიკა და ჩვენ მუდმივად ვამბობთ, რომ ნებისმიერი ტიპის სიმბოლიკა, რაც არ არის სახელწმიფო სიმბოლიკა, არ დაიშვება ჩვენს აქციებზე და გთხოვთ, რომ ეს გაითვალისწინოთ. არ აქვს მნიშვნელობა, რა სიმბოლიკა ექნება, რა ჯგუფს გამოხატავს, რა პარტიას გამოხატავს და ა.შ. მხოლოდ სახელმწიფო სიმბოლიკა დაიშვება ჩვენს აქციებზე და ეს იქნება იმის პრევენცია, რომ არ მოხდეს მსგავსი დაპირისპირებები აქ", — განაცხადა მან და აღნიშნა, რომ იქ არ არიან შეკრებილი ერთანეთთან საჩხუბრად, ან ერთმანეთის გამოსასწორებლად, არამედ ჰესის მშენებლობის წინააღდეგ.

გოლეთიანს სიმბოლიკის გამოყენებაზე განცხადება აქამდეც გაუკეთებია, თუმცა პარტიული სიმბოლიკის გამოყენებას კრძალავდა და ამბობდა, რომ არ სურდა პროტესტი რომელიმე პარტიასთან ყოფილიყო ასოცირებული. გუშინ, 23 მაისს გამართულ აქციაზე მყოფებს მხოლოდ საქართველოს სახელმწიფო დროშებისა და პირველი რესპუბლიკის დროშების მიტანა შეეძლოთ. მათი დიდი ნაწილი ადგილზე მისული იყო ჯვრებით, ხატებითა და სხვა ქრისტიანული სიმბოლიკით.


ნამახვანჰესის საწინააღმდეგო აქციაზე მისულ სირცხვილიას აქტივისტებს, სალომე ბარკერსა და ზუკა ბერძენიშვილს ლგბტ სამკლაურის გამო ადგილზე მყოფი ძალადობრივი და ჰომოფობიური ჯგუფის წევრები დაუპირისპირდნენ. ალექსანდრე ფალავანდიშვილი აქტივისტს უყვიროდა, სამკლაურის მოხსნას მოითხოვდა და ამბობდა, რომ აქციაზე მხოლოდ ამ შემთხვევაში უნდა დარჩენილიყვნენ.

სამკლაურით აქციაზე მისვლა ძალადობრივი ჯგუფის წევრებმა პროვოკაციად შეაფასეს. ადგილზე მყოფ პირთა ნაწილი, აქტივისტებს შეურაცხმყოფელი და დისკრიმინაციული ტერმინოლოგიით მიმართავდა.

როგორც სირცხვილიას აქტივისტებმა აღნიშნეს აქციაზე ჰესის მშენებლობის მოწინააღდეგეთა მხარდასაჭერად იყვნენ მისული, რადგან ხელისუფლებისთვის მიცემული ულტიმატუმის ვადა ამოიწურა და პროტესტის მხარდაჭერას აპირებდნენ. ბარკერმა განაცხადა, რომ ამ სამკლაურს უკვე ორი წელია ატარებს და "პროვოკაციისთვის" არ გაუკეთებია და არც მის მოხსნას აპირებს.

აქტივისტები დაპირისპირებული ჯგუფებიდან პოლიციამ გამოიყვანა. საბოლოოდ მათ აქცია დატოვეს.

გაიგეთ მეტი: