ფორსაჟის მეცხრე ფილმის მოლოდინი, საქართველოში მაშინ დაიწყო, როცა პირველად გავრცელდა ინფორმაცია იმასთან დაკავშირებით, რომ ფორსაჟში თბილისიც მიიღებდა მონაწილეობას.

მართალია, ჩვენი ქვეყნისთვის უცხოური გადამღები ჯგუფის სტუმრობა არ არის სიახლე, მაგრამ მსგავსი მასშტაბის ჰოლივუდის ფილმი ჯერ აქ არავის გადაუღია. ამიტომ გასაგებიცაა ის ფაქტი, რომ ყველა მოუთმენლად ელოდა მის გამოსვლას. შესაბამისად ფორსაჟის პრემიერა კინოთეატრ კავეაში მსოფლიო პრემიერამდე ერთი თვით ადრე შედგა.

მართალია, ქართულ პრემიერაზე ვინ დიზელი მხოლოდ პოსტერზე იყო წარმოდგენილი, მაგრამ სამაგიეროდ იმ ადამიანებს ვესაუბრეთ, ვინც საქართველოს მხრიდან ფილმის გადაღების პროცესში მონაწილეობდა.

"შეგვიძლია ვთქვათ, რომ მილიონობით ადამიანი ნახავს ჩვენს ქუჩებს დიდ ეკრანზე, თან ერთ-ერთ პრესტიჟულ ფილმში, რაც ჩვენი ქვეყნის ცნობადობას ნამდვილად გაზრდის", — განაცხადა სააგენტოს, აწარმოე საქართველოში, დირექტორმა მიშა ხიდურელმა. მისი თქმით, საქართველოს ამ ეტაპზე აქვს რესურსი, რომ ორ ან სამ დიდ პროექტს უმასპინძლოს. რაც ხელს შეუწყობს, როგორც ჩვენი ქვეყნის ეკონომიკის ზრდას, აგრეთვე ამ სფეროში მომუშავე პერსონალის კვალიფიკაციის გაზრდას.

Universal Pictures-თან უშუალო მოლაპარაკებას კომპანია Enkeny Films აწარმოებდა. მისი ხელმძღვანელი ბაჩო მებურიშვილის თქმით, თუკი ადრე მხოლოდ ერთ პროექტზე ჰქონდათ მოლაპარაკება, ამჯერად უკვე რამდენიმეს განიხილავენ. "თავიდან გვიწევდა აგვეხსნა სად იყო საქართველო, ახლა გვთხოვენ, რომ პირველად მათი პროექტები განვიხილოთ. თუკი წელს ფორსაჟი გამონაკლისი შემთხვევაა ჩვენი ქვეყნისთვის, გვჯერა, რომ მალე მსგავსი სახის პროექტები ჩვეულებრივი მოვლენა გახდება".

საქართველო ფილმში საათი და 47 წუთის შემდეგ ჩნდება. ყურებისას ნამდვილად შეიგრძნობ, როგორ გამოფხიზლდა ქართველი მაყურებელი, როცა დიდ ეკრანზე წარწერა თბილისი დაინახა.

ფორსაჟის გმირებს ძალიან გაუმართლათ, რომ ოპერაციის შესრულება პიკის საათებში არ მოუწიათ, შესაბამისად ქალაქი არც ისე გადატვირთული იყო. თბილისის შუაგულიდან რაკეტის აფრენა კი ნამდვილად საამაყო მომენტი იქნება ყველა ქართველისთვის.

სიმართლე რომ გითხრათ, ვინმემ რომ მკითხოს რაზეა ფილმი, ნამდვილად ვერ ვუპასუხებ ისე, რომ IMDb-ზე აღწერას არ ჩავხედო. მაგრამ, ფორსაჟის ფილმებში სიუჟეტი ყველაზე მოსაწყენი დეტალია, აქ მთავარია ოჯახური სიყვარული და ის ფაქტი, რომ თბილისში კორპუსებს შორის უზარმაზარი მანქანა აყირავდა, ისე თითქოს შავი ბუმბული ყოფილიყოს.

ამ ფილმში გმირებმა ბეწვის ხიდზეც გაიარეს, კოსმოსში გაემგზავრნენ და ყველა ცნობილი ფიზიკის კანონი ერთდროულად დაარღვიეს. მაგრამ, კინოში იმისთვის არ მივდივართ, რომ ვიღაცამ აგვიხსნას, როგორ მოქმედებს გრავიტაცია. ჩვენ "მფრინავი" მანქანების და გიგანტური მაგნიტების ყურება გვსიამოვნებს, რომელიც ძალიან უხდება თბილისის ქუჩებს.

თუკი მანქანას მართავ და კავეა გალერიადან გამოხვალ, ძნელია დასძლიოთ სურვილი იმისა, რომ იგივე ტრიუკები არ შეასრულო, რასაც ვინ დიზელი აკეთებს ჩვენს ქალაქში. თუ ამ პროექტმა, მართლაც ასე გაამართლა, ვინ იცის, იქნებ მალე საქართველოში უცხოპლანეტელებიც კი ჩამოვიდნენ. თუმცა სანამ მომავლისკენ ვიყურებით, აწმყოსთან კავშირი არ უნდა დავკარგოთ, ამიტომ შეგიძლია კავეაში რბოლის ველად ქცეული თბილისის ყურებით დატკბე.

ფილმის ნახვა დიდ ეკრანებზე საღამოს სეანსებზეც იქნება შესაძლებელი, რადგან კომენდანტის საათმა 23:00-მდე გადაიწია და კინოთეატრებს საღამოს სეანსების დამატების შესაძლებლობა მიეცა. ბილეთების გაყიდვა კინოთეატრებში უკვე დაიწყო.