29 და 30 მაისს ვინტილატორი და მუსიკალური ვენიუ სკვერი ერთად უბერავს და გთავაზობთ რაბაზარიას მარკეტების სერიას სკვერში.

"რაბაზარია, როგორც ყოველთვის, იქნება ადგილი, სადაც ყველაფერი კარგი მოსულა და პლატფორმა, რომელიც მუდმივად სიახლეებს გთავაზობთ. ჰოდა, ჩვენ არც წელს ვუღალატებთ ტრადიციებს და ცინცხალი სიურპრიზებითა და სიყვარულით, სიფერადით გაჯერებულ მარკეტს შემოგთავაზებთ", — ამბობენ ღონისძიების ორგანიზატორები.

როგორც ორგანიზატორები აღნიშნავენ, რაბაზარიას მისია წელსაც, ისევე როგორც მუდამ, იქნება ჩვენი პლანეტის მწვანე მომავალზე ზრუნვა, ცირკულარულ ეკონომიკაზე ცნობადობის გაზრდა და მდგრადი მოდის აღზევება, შესაბამისად მარკეტის თითოეული მონაწილე ეკო-მეგობრული მეწარმეების სიას მიეკუთვნება და ზრუნავს გარემოზე.

რა დაგხვდებათ მარკეტზე:

  • შესაშურად შერჩეულ-გადარჩეული ვინტაჟური ბრენდები.
  • GeClose2EU ბენეფიციარი საბავშვო ნივთების მწარმოებელი ქართული სტარტაპები.
  • GAFA-ს წარმომადგენელი ქართული ეკო-მეგობრული მოდის შემქმნელები.
  • ჭინჭები და ათასი წვრილმანი ფესტივალი მზესუმზირასგან.
  • დილის გარდერობი ფორმულასგან.

და რაც მთავარია, სიახლე ქართული მარკეტების ისტორიაში, სახალხო პირიმზე და რაბაზარიას სიამაყე, პროექტი "შეაკეთე", რომელიც ერთად შეყრის ქალაქის ხელმარჯვე ოსტატებს და იქვე, მარკეტზევე მოგცემთ საშუალებას მეორე და მესამე სიცოცხლე მისცეთ თქვენს საყვარელ ნივთებს: წარმოდგენილი იქნებიან სათვალეებისა და ფეხსაცმლის მკეთებელი დიდოსტატები, შეძლებთ ველოსიპედების, სკეიტებისა და სხვადასხვა ტექნიკის შეკეთებას, სამოსის ტანზე მოსარგებად მინი სამკერვალოც დაგხვდებათ და ავეჯის შეკეთების გურუებსაც, რაღა თქმა უნდა, საკადრისი ადგილი დაეთმობა.

ღონისძიებაზე გამოიფინება თანამედროვე მხატვრების ნამუშევრები დასათვალიერებლად და გასაყიდად.

"მარკეტზე ვეგეტარიანული კვება გვექნება, ხოლო ბარი თან დახუნძლული, თან მრავალფეროვანი და თან — შესაშურ ფასად. მუსიკა ლაღი, წამყვანი სელექციონერებითა და მუსიკალური კოლორიტებით დაკომპლექტებული: Shaman / Trotsky / Radio Grue / Alfreda Steiglitz / Gabunia / Vako T / Guga Gegechkori / Hasiro", — ამბობენ ორგანიზატორები.

მეგობრების შეკრების ახალი ადგილი ელბაქიძის დაღმართთან მდებარე მყუდრო სკვერია.

"მოკლედ, რა ბაზარია და ზუსტად კაი დროა მეგობრების სანახავად, ქართული სტარტაპების მხარდასაჭერად, რომელთაც კოვიდ-19-ით გამოწვეულმა რეალობამ საკმაოდ ავნო და, რაღა თქმა უნდა, მუდამ კაი დროა გარემოზე ზრუნვისთვისა და ცირკულარულ ეკონომიკაზე ცნობიერების ამაღლებისთვის", — ამბობენ ორგანიზატორები.