კვირაში 55 საათზე მეტხანს მუშაობთ? მაშინ, დროა, იმაზე დაფიქრდეთ, რომ სამსახური თქვენს სიცოცხლეს სერიოზულ საფრთხეს უქმნის.

ამაზე მიუთითებს ჯანდაცვის მსოფლიო ორგანიზაციისა და შრომის საერთაშორისო ორგანიზაციის უახლესი ერთობლივი კვლევა. მის მიხედვით, ყოველწლიურად მსოფლიოში 745 ათასი ადამიანი იღუპება მუშაობით გადატვირთვისგან.

კვლევა, რომლის ანგარიშიც 17 მაისს გამოქვეყნდა Environment International-ის გამოცემაში, მუშაობით გადაღლასთან დაკავშირებული სიკვდილიანობის გლობალურად გაანალიზების პირველი მცდელობაა.

2016 წლის სტატისტიკა, რომელიც კვლევაშიცაა მოხსენიებული, კონკრეტულ მიზეზებზე მიუთითებდა: მინიმუმ 55-საათიანი სამუშაო კვირის შედეგად, 398 ათასი ადამიანი ინსულტით, 347 ათასი კი — გულის დაავადებით გარდაიცვალა. აღსანიშნავია, რომ სტატისტიკა მზარდია — 2000 წლიდან 2016 წლამდე, გულის დაავადებებით გარდაცვლილთა რიცხვი 41,5 პროცენტით, ინსულტით დაღუპულების კი — 19 პროცენტითაა გაზრდილი.

პროცენტული სხვაობები გამოხატულია სხვა მაჩვენებლებითაც: შეუსაბამო სამუშაო საათების მსხვერპლთა 72 პროცენტი კაცია. ამასთან, ყველაზე მაღალი რისკის ქვეშ შუახნის ასაკის ადამიანები არიან, რომლებიც 45 წლიდან 74 წლამდე ხანგრძლივად მუშაობას განაგრძობენ.

ამჟამინდელი შეფასებით, მსოფლიო მოსახლეობის 8,9 პროცენტი კვირაში 55 საათზე მეტხანს მუშაობს. მათი უდიდესი ნაწილი სამხრეთ-აღმოსავლეთ აზიაში, ყველაზე ნაკლები კი — ევროპაში ცხოვრობს.

ფოტო: Adam Eastburn / Dribbble

ეკონომიკური კრიზისი და დისტანციური მუშაობა

მნიშვნელოვანია ის მიზეზებიც, რომლითაც ექსპერტები მზარდი სტატისტიკის ახსნას ცდილობენ; ნაწილის აზრით, ეს გაუარესებული ეკონომიკური სიტუაციის შედეგია, დანარჩენები კი ფიქრობენ, რომ მთავარი ფაქტორი ახალი სამუშაო კულტურის ჩამოყალიბებაა, რომელიც სმარტფონებსა და ლეპტოპებს მოიცავს და სამუშაო დღის განსაზღვრული ხანგრძლივობის მოშლას იწვევს.

ორივე დასახელებული მიზეზი, რასაკვირველია, კიდევ უფრო გამწვავდა კორონავირუსის პანდემიის გამო, როცა ეკონომიკურად ძლიერმა ქვეყნებმაც კი დიდი ზარალი მიიღეს, დასაქმებულთა უმეტესობამ კი მუშაობა სახლიდან განაგრძო. ამ ყველაფერს, სავარაუდოდ, განგრძობითი სახე ექნება პოსტპანდემიურ რეალობაშიც.

"კორონავირუსის პანდემიამ მნიშვნელოვანწილად შეცვალა ადამიანების მუშაობის სტილი", — აღნიშნავს ჯანდაცვის მსოფლიო ორგანიზაციის გენერალური დირექტორი, ექიმი ტედროს ადანომ გებრეისუსი, — "დისტანციურმა მუშაობამ ბევრ სფეროში მოიკიდა ფეხი, რის გამოც სახლსა და სამსახურს შორის საზღვარი გაბუნდოვანებულია. ამას გარდა, ბევრმა კომპანიამ ფულის დასაზოგავად კადრები შეამცირა, თუმცა, ამან, რა თქმა უნდა, სამუშაოს ოდენობა არ შეცვალა, რის გამოც დარჩენილ კადრებს უფრო ხანგრძლივად მუშაობა უხდებათ.

"არცერთი სამუშაო არ ღირს ინსულტად ან გულის დაავადებად. მთავრობები, დამსაქმებლები და დასაქმებულები უნდა შეთანხდნენ იმ საზღვრებზე, რომლებიც მომუშავეების ჯანმრთელობას დაიცავს".

ტენდენციის გაგრძელების შემთხვევაში, მსოფლიოში ადამიანების ჯანდაცვა მეტად პრობლემური გახდება. ზოგიერთი მკვლევარი მიიჩნევს, რომ ამ გამოწვევასთან გასამკლავებლად, მთავრობებმა უნდა შეიმუშაონ ერთიანი პოლიტიკა, რომელიც სავალდებულო ზეგანაკვეთურ სამუშაოს აკრძალავს და სამუშაო დროის ლიმიტს დააწესებს.

"კვირაში 55 საათის განმავლობაში ან მეტხანს მუშაობა ჯანმრთელობისთვის სერიოზული საფრთხის მომტანია", — ხსნის ჯანდაცვის მსოფლიო ორგანიზაციის წარმომადგენელი, ექიმი მარია ნეირა, — "დროა, რომ ჩვენ ყველამ, მთავრობებმა, დამსაქმებლებმა და დასაქმებულებმა გამოვიღვიძოთ და თვალი გავუსწოროთ იმ ფაქტს, რომ ხანგრძლივად მუშაობა ნაადრევ სიკვდილს იწვევს".

ხანგრძლივი მუშაობა იწვევს არა მხოლოდ ფიზიკური, არამედ მენტალური ჯანმრთელობის გაუარესებასაც. Responsible.ge ევროპაბეთის პლატფორმაა, რომელიც საზოგადოებაში აზარტული თამაშების შესახებ ცნობიერების ამაღლებასა და პასუხისმგებლიანი თამაშის პოპულარიზაციას ემსახურება. ამასთანავე, პლატფორმის დახმარებით, შეგიძლიათ, გაეცნოთ პასუხისმგებლიანი თამაშის ხელსაწყოებსა და ანგარიშებს, ასევე ინფორმაციას ევროპაბეთის პასუხისმგებლობის შესახებ საზოგადოების მიმართ, ბიზნესსა და კომუნიკაციაში.