კომპანია Glovo-ს ცნობით, კურიერებთან შეთანხმება შედგა, ხოლო კურიერების ნაწილს, რომლებსაც დროებით შეჩერებული ჰქონდათ აპლიკაციასთან წვდომა, ბლოკი მოეხსნათ. კომპანიის ინფორმაციით, ისინი ჩვეულ რეჟიმში გააგრძელებენ მუშაობას და აპლიკაცია შეფერხებით აღარ იმუშავებს.

"Glovo-სა და პარტნიორ კურიერებს შორის შეთანხმება შედგა. 17 მაისიდან ძალაში შევიდა განახლებული ანაზღაურების სისტემა, რომელიც მთლიანად მორგებულია გლოვერების საჭიროებებსა და უსაფრთხოებაზე და უზრუნველყოფს ბონუსური სისტემის სამართლიანი პრინციპით გადანაწილებას და საბაზისო ტარიფის ზრდას.

ცვლილებების მიზანია პარტნიორი კურიერებისთვის უფრო მოქნილი, ხელსაყრელი პირობების შეთავაზება. ახალი სისტემის პირობებში, გლოვერებს საშუალება ექნებათ, უფრო მარტივად და სწრაფად გამოიმუშავონ დამატებითი ანაზღაურება", — აცხადებენ კომპანიაში.

17 მაისს დაახლოებით, 50-მდე კურიერს Glovo-მ აპლიკაციასთან წვდომა შეუჩერა. წინა დღით, 16 მაისს Glovo-ს კურიერებმა თბილისში აქცია გამართეს. ისინი იმ ცვლილებებს აპროტესტებდნენ, რომელიც კომპანიაში განხორციელდა. მათ შორის, საუბრობდნენ საბონუსე სისტემასა და საათების შემცირებაზე.