ჰომოფობიურად განწყობილი ის ადამიანები, რომლებიც თითქოს ამბობენ, რომ "არავის არაფერს ერჩიან", იქვე იმასაც აღნიშნავენ, რომ "პროპაგანდა საჭირო არ არის", "ქუჩაში ნუ გამოდიან" და "ხალხს ნუ აღიზიანებენ".

მოკლედ, ყველას კარგად გვსმენია ასეთი "კეთილისმყოფელების" საფირმო დევიზი: "სახლში რაც უნდათ, ის აკეთონ".

საინტერესოა, როგორი იქნებოდა ჰეტეროსექსუალების (ადამიანები, რომელთაც სექსუალური ლტოლვა საპირისპირო სქესის მიმართ აქვთ) ცხოვრება, მათი ორიენტაციის გამო ოჯახში, ქუჩასა თუ სამსახურში საზოგადოებისგან იმავე წნეხს, პრობლემებს, დისკრიმინაციასა და ძალადობას რომ აწყდებოდნენ, რაც ჰომოსექსუალი, ბისექსუალი, ტრანსგენდერი თუ სხვა ყველა ქვიარი ადამიანის ყოველდღიურობის განუყოფელი ნაწილია.

შესაძლოა, ვიღაცისთვის მარტივი სათქმელია, "სახლში ვინ გივარდება, გარეთ ნუ გამოდიხარ"-ო, მაგრამ სწორედ ასეთმა ადამიანებმა უკეთ რომ გაიგონ, მაინც როგორია ლგბტქი თემის წევრების მიმართ არსებული უსამართლო და უთანასწორო მოთხოვნები, გთავაზობთ, წარმოვიდგინოთ პარალელური რეალობა, სადაც ჰეტეროსექსუალ ადამიანებს ანალოგიურად მოექცეოდნენ. ამ გზით ჰომოფობიის აბსურდულობაში კიდევ ერთხელ დარწმუნდებით.

1. ჰეტეროსექსუალები ქუჩაში შეყვარებულს ხელს ვერ ჩაჰკიდებდნენ

ფოტო: iStock

თუ ქალი და კაცი ხელიხელჩაკიდებული ქუჩაში გაივლიდა, ყველაზე მსუბუქ შემთხვევაში ამას მაინც მიაძახებდა ვინმე: "ფუ, თქვე ჰეტეროებო".

2. ასევე შეყვარებულს საჯაროდ ვერ აკოცებდნენ

ფოტო: Public Domain

რადგან ეტყოდნენ, რომ მათი სიყვარული პროპაგანდის ნაწილია და ეს უნდა შეწყვიტონ!

3. თუ კაცს ქალი მოეწონებოდა და ქალს — კაცი, მაშინ ისინი ან ცოდვილებად ჩაითვლებოდნენ, ან კიდევ ავადმყოფებად

ფოტო: Public Domain

ამის გამო უნდა მოინანიო, ან იმკურნალო — გააჩნია, ვის დაუჯერებდი. ამის უტყუარობაში დასარწმუნებლად კი ყველაზე გონებამახვილები იმასაც იტყოდნენ, რომ ღმერთმა შექმნა ადამი და ჯონდო, ევა და ნანული და არა — ადამი და ევა!

4. ჰეტეროსექსუალობა გადამდები იქნებოდა

ფოტო: Getty Images

ასეთ ადამიანებს ხშირად დასდებდნენ ბრალს, რომ ბავშვებს რყვნიან.

5. გამოვიდოდა სიმღერები, სახელწოდებით "მამაკაცს არასდროს ერქმევა ქმარი" ან "დედაკაცი ვერ იქნება ცოლი"

ფოტო: Tumblr

დიახ, პოპულარული რეპერები ჩათვლიდნენ, რომ ეს არასწორია.

6. საკუთარი ორიენტაციის დასამალად ჰეტეროსექსუალებს გეი ქორწინებაში მოუწევდათ ყოფნა

ფოტო: YouTube

სულ მინიმუმ იმის გამო, რომ მშობლები გაეხარებინათ.

7. დასცინებდნენ მასკულინურ კაცებსა და ფემინურ ქალებს

ფოტო: J. HOWARD MILLER

"კაცს სპორტი როგორ უნდა გიყვარდეს, ქალს კიდევ მაკიაჟი???"

8. ადამიანებს, რომელთა გენდერული იდენტობა ბიოლოგიური სქესის შესაბამისი იქნებოდა, სახლიდან გამოაგდებდნენ, სამსახურში არ აიყვანდნენ და ხშირად სამედიცინო დახმარებაზეც უარს ეტყოდნენ

ფოტო: iStock

ამის გამო მათი ერთადერთი საარსებო წყარო, შეიძლება, პროსტიტუცია გამხდარიყო, რის გამოც კიდევ სხვა უამრავი დისკრიმინაციის მსხვერპლები გახდებოდნენ.

9. იმ ქართული ფილმის ჩვენებების ჩაშლას ეცდებოდნენ, რომელშიც მოცეკვავე ქალისა და კაცის სიყვარული იქნებოდა ასახული

ფოტო: გვანცა ნემსაძე / On.ge

რადგან ეს ტრადიციების შეურაცხყოფად ჩაითვლებოდა.

10. მოითხოვდნენ იმ ქართველი ფეხბურთელის დისკვალიფიკაციას, რომელიც ცისარტყელის ფერებში სამკლაურს არ გაიკეთებდა

საქართველოს ნაკრებში ასეთ მოთამაშეს არ დაუშვებდნენ!

11. თუ ოსკარებზე ისეთი ფილმი გაიმარჯვებდა, სადაც ქალისა და კაცის სიყვარული იქნებოდა ნაჩვენები, იტყოდნენ, რომ ეს პროპაგანდის და პოლიტკორექტულობის ბრალია

ფოტო: Lionsgate

აბა, სხვაგვარად როგორ შეიძლება ამ თემაზე კარგი ფილმი გადაიღო?!

12. ბოლოს კი, ჰეტეროსექსუალებს ქამინგ აუთი — საკუთარი ორიენტაციის აღიარება და მიმღებლობის მოპოვება დასჭირდებოდათ

ფოტო: TEMI OYELOLA

"დედა, მამა, მე ჰეტეროსექსუალი ვარ..."

ბონუსი: ბისექსუალებს ისევ იმის მტკიცება დასჭირდებოდათ, რომ არსებობენ

ფოტო: Marta Pucci