გირჩი — მეტი თავისუფლების ლიდერი, ზურაბ ჯაფარიძე აცხადებს, რომ ფრაქციულ მუშაობასა და საპარლამენტო საქმიანობაში ჩართვის სურვილი არ აქვს.

"მე არ მაქვს არანაირი სურვილი, რომ ფრაქციულ მუშაობაში ან ზოგადად, საპარლამენტო რუტინაში გადავეშვა. ამის გაკეთებას არ ვაპირებ, თუმცა ტექნიკურად თუ ვინმეს დასჭირდა ჩემი ხელმოწერა, რომ რაღაც ფრაქცია შექმნას და შემდეგ იქ ფრაქციის რესურსები, მათ შორის, დროის მხრივ გამოიყენოს, თუნდაც იგივე შარლ მიშელის დოკუმენტში არსებული პუნქტების ლობირებისთვის პარლამენტში, ვიღაცას შეიძლება ხელი მოვუწერო, მაგრამ თვითონ ასეთი მიზანი არ მაქვს, ანუ საპარლამენტო რუტინაში, საპარლამენტო საქმიანობაში, ზოგადად, მონაწილეობას არ ვიღებ", — განაცხადა ჯაფარიძემ TV პირველის ეთერში.

პარლამენტში პირველი ოპოზიციური ფრაქცია, ლელო — პარტნიორობა საქართველოსთვის შეიქმნა. მისი თავმჯდომარე ლელოს გენერალური მდივანი, ბადრი ჯაფარიძე იქნება. ლელოს წევრებთან ერთად, ფრაქციის წევრები იქნებიან დეპუტატები შალვა შავგულიძე, არმაზ ახვლედიანი და სალომე სამადაშვილი. სწორედ სამადაშვილი იქნება ფრაქციის თავმჯდომარის მოადგილე.