სტრატეგია აღმაშენებლის ერთ-ერთი წევრის, პაატა მანჯგალაძის განცხადებით, როცა ქართული ოცნება ელექტორატულ ეროზიას განიცდის, "ქოცი პირდაპირ ნაცი არ ხდება" და ეს ამომრჩეველი "შუაში ჩერდება". ამის შესახებ მან პალიტრანიუსის ეთერში ისაუბრა.

"როცა ქართული ოცნება განიცდის ელექტორატულ ეროზიას, ქოცი პირდაპირ ნაცი არ ხდება, იმას აქვს ტრანზაქციის პერიოდი, შუაში ჩერდება ეს ელექტორატი და ეს ხალხი კი არ უნდა დავაფრთხოთ 5-იანი ნომრით, აუცილებელია იყოს პარტია და ჯგუფი [...] გამტარი კი არა, გვინდა, [ელექტორატის] შემოგროვებლები ვიყოთ", — თქვა მან.

შემოდგომაზე თვითმმართველობის არჩევნები უნდა ჩატარდეს. ოპოზიციაში უკვე საუბრობენ იმაზე, რომ ამ არჩევნებზე ისინი კვლავ გაერთიანებული სახით უნდა წარდგნენ. კერძოდ, არის ვარაუდი, რომ ოპოზიცია საერთოდ კანდიდატად ნაციონალური მოძრაობის თავმჯდომარეს, ნიკა მელიას დააყენებს. თუმცა რამდენიმე პარტიამ ენმ-ს კანდიდატის მხარდაჭერაზე უარი უკვე თქვა, მათ შორის, სტრატეგია აღმაშენებლის ლიდერმა, გიორგი ვაშაძემ. მისი განცხადებით, უნდა შეიქმნას მესამე, "მძლავრი მიზიდულობის ცენტრი", რომლითაც ხელისუფლების ცვლილების პროცესი დაიწყება.