ტოლერანტობისა და მრავალფეროვნების ინსტიტუტი აცხადებს, რომ მართლმადიდებელი ეკლესიის სასულიერო პირების ძალადობრივმა ქმედებებმა და ჟურნალისტებზე თავდასხმამ საგანგაშო ხასიათი მიიღო. ორგანიზაცია მიტროპოლიტი ანტონის მხრიდან მთავარი არხის ჟურნალისტზე თავდასხმას გამოეხმაურა.

როგორც TDI-ში აღნიშნავენ, საპატრიარქოს არცერთი ძალადობრივი ქმედება არ დაუგმია და საჯაროდ ბოდიში არ მოუხდია საზოგადოების წინაშე, ხოლო ხელისუფლება მსგავს ფაქტებზე თვალს ხუჭავს.

"დღემდე არ გვინახავს, ეკლესიის სასულიერო პირებს პასუხი ეგოთ ჩადენილი ძალადობისთვის. გავლენიანი სასულიერო პირების ქმედებები ასაზრდოებს და აქეზებს საზოგადოებაში სიძულვილს და ძალადობას", — ნათქვამია განცხადებაში.

ორგანიზაცია მოუწოდებს შინაგან საქმეთა სამინისტროს გამოიძიოს ჟურნალისტ ირაკლი ვაჩიბერაძეზე ვანი-ბაღდათის ეპარქიის მმართველის, მიტროპოლიტ ანტონ ბულუხიას მიერ ძალადობისა და ჟურნალისტური საქმიანობის განხორციელებაში ხელშეშლის ფაქტი. ასევე, 4 მაისს დავითგარეჯის სამონასტრო კომპლექსის მიმდებარედ მთავარი არხის ჯგუფზე ძალადობის შემთხვევა.

გარდა ამისა, TDI მოუწოდებს საპატრიარქოსაც, გაიაზროს აღკვეთოს სასულიერო პირების ძალადობა, ჟურნალისტებზე თავდასხმა და საზოგადოებაში სიძულვილის გაღვივება.

მთავარი არხის ინფორმაციით, 7 მაისს, ჟურნალისტ ირაკლი ვაჩიბერაძეს, პროფესიული საქმიანობის შესრულებისას ფიზიკური და სიტყვიერი შეურაცხყოფა მიაყენა ვანისა და ბაღდათის მიტროპოლიტმა ანტონმა. ტელეკომპანიის მიერ გავრცელებულ კადრებში ჩანს, რომ ინტერვიუსთვის მისულ ჟურნალისტს მეუფე ანტონი აგრესიით ხვდება და მოუწოდებს, რომ ადგილი დატოვოს. მოგვიანებით კი მიტროპოლიტი ვაჩიბერაძეს ხელი დაარტყა.

მიტროპოლიტ ანტონის გაღიზიანება მოჰყვა ჟურნალისტის კითხვას 6 მაისს, ურბნელი მიტროპოლიტი იობის რეზიდენციაში მომხდარ ფაქტთან დაკავშირებით. საქმე ეხება დეკანოზ თეიმურაზ თათარაშვილს, რომელსაც სურამისა და ხაშურის ეპისკოპოსის, სვიმეონ ცაკაშვილის მძღოლი ფიზიკურად გაუსწორდა.