ცნობილი კანადელი მომღერალი ჯასტინ ბიბერი კონცერტის ჩასატარებლად ინდოეთს, კერძოდ მუმბაის ეწვევა. კონცერტი 10 მაისს გაიმართება და მასზე დასასწრები ბილეთები თითქმის მთლიანად გაყიდულია.

ბილეთების გაყიდვის ტემპმა ინტერნეტ-მომხმარებლები გააოცა. საქმე ისაა, რომ პოპ-ვარსკვლავის კონცერტზე დასასწრები ბილეთების ფასი საკმაოდ მაღალია. ყველაზე ძვირადღირებული $1,149 დოლარიანი ბილეთებიც კი მთლიანად გაყიდულია.

დარჩენილია მხოლოდ VVIP და GOLD კლასის ბილეთები, რომელთა შესაძენადაც უზარმაზარი ონლაინ რიგია შექმნილი.

ფოტო: bookmyshow.com

ბილეთების მომლოდინეთა რიგი სულ უფრო და უფრო იზრდება.

ტვიტერის მომხმარებელმა, კინოკრიტიკოსმა და პუბლიცისტმა სარიტ რეიმ აღნიშნულ ფაქტთან დაკავშირებით აღშფოთება ვერ დამალა და პოსტი დაწერა.

"თქვენ გგონიათ, რომ ინდოეთში მხოლოდ ბანკომატებთან არის რიგი? სხვა თუ არაფერი, ბანკომატებთან ფულის ასაღებად მაინც იცდიან და არა გასაფლანგად", - წერს სარიტ რეი.

სარიტ რეის არც სხვა ტვიტერის მომხმარებლები ჩამორჩენილან. მომხმარებელი ვინაია სავანტი გაოცებას ვერ მალავს, რომ ბიბერის კონცერტზე ასეთი დიდი მოთხოვნაა. მომხმარებელი კონცერტის ბილეთში გადახდილმა 58,030 და 76,000 რუპმა გააოცა. ეს თანხა 868 დოლარს უტოლდება.

კომენტარი გააკეთა ცნობილმა ინდოელმა კომიკოსმა, მწერალმა და ფემინისტური მოძრაობების მხარდამჭერმა სორა პანტმაც.

"76,00 რუპი (1137$) ჯასტინ ბიბერის კონცერტისთვის. ინდოეთში ამ თანხით პირდაპირ სცენაზე იყიდიდი ბუნგალოს", - წერს კომიკოსი.

ახლო წარსულში ინდოეთს უკვე ეწვია Coldplay, რომლის ბილეთებიც ასევე ძვირი იყო. მაშინ ინდოელმა ხალხმა ბევრი იწუწუნა მაღალი ფასების გამო. სწორედ ამის შესახებ ხუმრობს ტვიტერის კიდევ ერთი მომხმარებელი.

"ვწუხვარ ბიბერ, ჩემი ორგანოების უმეტესობა უკვე გავყიდე iPhone 5,6,7 და Coldplay-ის კონცერტის გამო. სამწუხაროდ, შენი კონცერტისთვის გასაყიდი აღარაფერი დამრჩა."

საქართველოს უახლოეს წარსულში ბილეთების ონლაინ რიგში დგომის გამოცდილება უკვე აქვს, როდესაც სუპერ თასის ფინალში თბილისს “ბარსელონა“ და “სევილია“ ესტუმრნენ, ბილეთების ყიდვის მსურველთა დიდი რაოდენობის გამო საიტი გადაიტვირთა და გაითიშა. საბოლოოდ ბილეთები ვაკის პარკში, ცოცხალი რიგის ფონზე გაიყიდა. ასე რომ, ინდოელები ვერაფრით გაგვაკვირვებენ.