ჯანდაცვის მინისტრის მოადგილის, თამარ გაბუნიას განცხადებით, როდესაც ქვეყანაში ფართომასშტაბიანი ვაქცინაცია დაიწყება, ვაქცინირებულთათვის სტიმულებზე შემდეგ ისაუბრებენ. მისი თქმით, ეს, ალბათ, ივლისის თვისკენ მოხდება.

"ჯერ ცოტა ადრეა, რადგან ჩვენ მეტად ფართო მოცვა გვჭირდება ვაქცინაციით მოსახლეობის, რადგან ყველას ჰქონდეს არჩევანი და მარტივად ჩაიტაროს ვაქცინაცია. ალბათ, ესეც უფრო ივლისის თვისკენ, როცა გადავალთ მეტად აქტიურ, ფართო მოცვაზე მოსახლეობის, რომ გათანაბრდეს და ვინმეს არ დარჩეს განცდა, რომ მისი მიზეზით კი არა, რაღაც გარეშე მიზეზებით ვერ ჩაიტარა ვაქცინაცია და ამდენად, გარკვეულწილად, დისკრიმინირებული შეიძლება აღმოჩნდეს იმის გამო, რომ ვერ მიიღებს შეღავათს. როცა დაიწყება ფართომასშტაბიანი ვაქცინაცია, მაშინ უფრო აქტიურად ვისაუბრებთ სტიმულებზე", — თქვა მან.

მისი განმარტებით, ეს სტიმულები შეიძლება იყოს შეზღუდვებისგან გათავისუფლება, გადაადგილების შეზღუდვის მოხსნა, თუმცა ჯერ კონკრეტული პაკეტი მომზადებული არ არის.

"ასევე, საუბარია ბიზნესის წახალისებაზე, იმისთვის, რომ მათ შექმნან ეპიდემიოლოგიურად უსაფრთხო გარემო. მთავარი აქცენტი აქ გადავა იმაზე, რომ მომხმარებელმა იცოდეს — კონკრეტული სასტუმრო, რესტორანი დაკომპლექტებულია ვაქცინირებული პირებით და იქ არის ეპიდემიოლოგიურად უსაფრთხო გარემო და მიენიჭოს სერტიფიკატით ან რაიმე თვალსაჩინო ნიშანი", — განაცხადა გაბუნიამ.

რამდენიმე დღეა საკოორდინაციო საბჭოს წევრები ვაქცინირებულთთათვის შეღავათების დაწესებაზე საუბრობენ. 26 აპრილს დაავადებათა კონტროლის ეროვნული ცენტრის დირექტორმა, ამირან გამყრელიძემ თქვა, რომ მომხრე არიან, კორონავირუსის საწინააღმდეგო ვაქცინით აცრილებისთვის შესაბამისი "პრივილეგიები" დაწესდეს. იმავე დღეს, ჯანდაცვის მინისტრის მოადგილემ, თამარ გაბუნიამ განაცხადა, რომ განიხილება კოვიდპასპორტის დანერგვა.