ცოტა ხნის წინ მსოფლიო ინდონეზიის ფლოტის გაუჩინარებული წყალქვეშა ნავის ამბავმა მოიცვა, რომლის ეკიპაჟის წევრებსაც რამდენიმე დღის განმავლობაში უშედეგოდ ეძებდნენ. საბოლოოდ, ოფიციალური განცხადების მიხედვით, წყალქვეშა ნავის ნამსხვრევები აღმოჩენილია. სახელმწიფომ ეკიპაჟის 53-ვე წევრის გარდაცვალება დაადასტურა.

ამ ტრაგედიის ფონზე, ინტერნეტსივრცეში ეკიპაჟის დაღუპული წევრების სიმღერის ვიდეო გავრცელდა, რომელიც წყალქვეშა ნავის ჩაძირვამდე რამდენიმე კვირით ადრე, სწორედ ამ ნავზეა გადაღებული. ისინი ინდონეზიურ გამოსამშვიდობებელ სიმღერას, სახელად Sampai Jumpa მღერიან, რომლითაც მათ ფლოტის ერთ-ერთი მეთაური გააცილეს. გამოსამშვიდობებელმა სიმღერამ ტრაგედიის შემდეგ ახალი და უფრო სევდიანი მნიშვნელობა შეიძინა.

"მიუხედავად იმისა, რომ არ ვარ მზად, მენატრებოდე, არ ვარ მზად, შენ გარეშე ვიცხოვრო, ყოველივე საუკეთესოს გისურვებ", — მღერიან ფლოტის წევრები.

ინდონეზიის პრეზიდენტმა ჯოკო ვიდოდომ განაცხადა, რომ დაღუპულებს დამსახურებისთვის მედლებს გადასცემენ და დააწინაურებენ. ამასთანავე, მათი შვილების განათლებას სახელმწიფო უზრუნველყოფს.

ექსპერტების თქმით, დაახლოებით 800 მეტრის სიღრმეზე ჩაძირული წყალქვეშა ნავის ნამსხვრევების ზედაპირზე ამოტანასა და დაღუპულების გადმოსვენებას განსაკუთრებული აღჭურვილობა დასჭირდება.