ლესბოსელი წყვილი, რომელსაც კაცი ჰომოფობიურ ნიადაგზე თავს დაესხა, დაზარალებულად ცნეს. ინფორმაცია On.ge-ს საქართველოს პროკურატურაში დაუდასტურეს.

პროკურატურის ინფორმაციით, სექსუალური ორიენტაციის გამო შეუწყნარებლობის მოტივით მუქარის და იძულების, ასევე კომპიუტერულ სისტემაში უნებართო შეღწევის საქმეზე თავდამსხმელს ბრალი წარუდგინეს, ხოლო პატიმრობის შეფარდების შუამდგომლობით თბილისის საქალაქო სასამართლოს უკვე მიმართეს.

Tbilisi Pride-ის ინფორმაციით, 20 აპრილს, თბილისში, საკუთარი საცხოვრებელი კორპუსის ეზოში, ლესბოსელ წყვილს არასრულწლოვანი ბავშვის თანდასწრებით მეზობელი კაცი ჰომოფობიურ ნიადაგზე თავს დაესხა. ორგანიზაციის ცნობით, თავმდამსხმელი მათ სიტყვიერ შეურაცხყოფას აყენებდა, იგინებოდა და იყენებდა სხვა დამამცირებელ გამონათქვამებს. მათივე ინფორმაციით, მოგვიანებით თავდამსხმელმა ჯიბიდან ამოიღო დასაკეცი დანა, გაშალა და წყვილს ემუქრებოდა.

როგორც შინაგან საქმეთა სამინისტროში On.ge-ს უთხრეს, თავდამსხმელი უკვე დაკავებულია, ხოლო გამოძიება სისხლის სამართლის კოდექსის 150-ე (იძულება), 151-ე (მუქარა) და 284-ე (კომპიუტერულ სისტემაში უნაბართვო შეღწევა) მუხლებითაა დაწყებული.