სტრატეგია აღმაშენებლის ლიდერი, გიორგი ვაშაძე აცხადებს, რომ შარლ მიშელის ინიციატივით შექმნილი დოკუმენტის ყველა პუნქტი შესრულება და ამის გარანტი თავადაა. ვაშაძისთვის შეთანხმების ყველა პუნქტის შესრულების გარანტი დასავლელი პარტნიორების მხარდაჭერაცაა.

"მთავარი ორიენტირი უნდა იყოს სწრაფ იმპლემენტაციაზე. დღეს ზოგიერთმა დაწერა, რომ არ შესრულდება ეს პუნქტებიო. აგერ მე და აგერ თქვენ, ყველა პუნქტი სათითაოდ შესრულდება, მე ვარ ამის გარანტი პირდაპირ გეუბნებით [...]

ამის გარანტია, რაც მთავარია, ის სასწაული მხარდაჭერა, რაც ჩვენ ახლა გვაქვს დასავლეთისგან. მხარდაჭერა გვაქვს ჩვენ, რომ იცოდეთ, იმ ხალხს, ვინც ხელი მოაწერა დოკუმენტს პირველივე დღეს. იცით რატომ? იმიტომ, რომ დასავლეთმაც დაინახა დესტრუქციული ქართული ოცნება, დესტრუქციული ნაციონალური მოძრაობა. ეს არის ახალი გზა", — განაცხადა გიორგი ვაშაძემ TV პირველის ეთერში.

19 აპრილს ევროპული საბჭოს პრეზიდენტის, შარლ მიშელის ახალ დოკუმენტს შვიდმა პოლიტიკურმა პარტიამ და რამდენიმე დამოუკიდებელმა დეპუტატმა მოაწერა ხელი. ხელმოწერის ცერემონია პრეზიდენტის სასახლეში გაიმართა და ონლაინ-რეჟიმში თავად მიშელიც დაესწრო.

დოკუმენტზე ხელმოწერაზე უარი თქვეს ნაციონალურმა მოძრაობამ და ევროპულმა საქართველომ. ასევე, ლეიბორისტულმა პარტიამ. თუმცა, აღსანიშნავია, რომ ამ პარტიებიდან ცალკეულმა დეპუტატებმა დოკუმენტს ხელი ინდივიდუალური გადაწყვეტილების საფუძველზე მოაწერეს.

გაიგეთ მეტი: