რეჟისორმა რეზო გიგინეიშვილმა თვითმფრინავის ბიჭების ისტორია კინოში გააცოცხლა. ფილმის პრემიერა ბერლინის საერთაშორისო კინოფესტივალზე შედგა.

როგორც მოსალოდნელი იყო, პრესა თემით დაინტერესდა და პირველი შეფასებებიც დაწერეს.

ერთ-ერთი ყველაზე ცნობილი კინოკრიტიკოსი, ანტონ დოლინი წერს, რომ საქართველომ ეს ფილმი აუცილებლად უნდა წარადგინოს ოსკარზე საუკეთესო უცხოენოვანი ფილმის კატეგორიაში, რადგან შანსები რეალურია.

გიგინეიშვილის ფილმს ასევე ეხმიანება გავლენიანი გამოცემა Variety. ჟურნალისტი ჯესიკა კაინგი წერს, რომ საქართველომ მოახერხა, მოეშორებინა ყოფილი საბჭოთა ქვეყნის სტატუსი და ამის მაგალითია ისიც, რომ საინტერესოდ განვითარდა ქვეყნის კინო.

"ქართულ კინოში ახალი ტალღა დაიწყო, ამის ნათელი მაგალითი კი რეზო გიგინეიშვილის ფილმი მძევლებია, რომელიც 80-იანი წლების ტრაგიკული ისტორიას მოგვითხრობს", - წერს ავტორი.

თუმცა, აქვე ნათქვამია ისიც, რომ რეჟისორს კიდევ უფრო მეტი შეიძლება გაეკეთებინა საინტერესო ისტორიის წარმოსაჩენად.

მძევლები 1983 წელს ქართველი ახალგაზრდების მიერ თვითმფრინავის გატაცების მცდელობას ეხება. რეჟისორთან ერთად სცენარზე მწერალმა ლაშა ბუღაძემ იმუშავა. სიუჟეტი 80-იან წლებში მომხდარ მოვლენებს ზედმიწევნით არ მიჰყვება და ინტერპრეტაციის საშუალებას იძლევა.

ფილმი ქართულ-რუსულ-პოლონური მხარეების ერთობლივი პროდუქციაა. ეს არის პირველი შემთხვევა, როდესაც ფილმი ქართული და პოლონური კინოცენტრების ერთობლივი დაფინანსებით შეიქმნა. აღსანიშნავია ისიც, რომ მძევლების ერთ-ერთი პროდიუსერი ოსკაროსანი ფილმის, იდას მთავარი პროდიუსერი ევა პუშინსკაა.

ფილმში მონაწილეობენ: თინა დალაქიშვილი, ირაკლი კვირიკაძე, გიგა დათიაშვილი, გიორგი გრძელიძე, ბექა ლემონჯავა, გიორგი ტაბიძე, გიორგი ხურცილავა, ვახტანგ ჩაჩანიძე, ეკატერინე კალატოზიშვილი, დარეჯან ხარშილაძე, მერაბ ნინიძე, ავთანდილ მახარაძე, მიშა გომიაშვილი და სხვები.