ნაციონალური მოძრაობის ერთ-ერთი წევრის, თინა ბოკუჩავას განცხადებით თავმჯდომარის, ნიკა მელიას გათავისუფლების ფორმასთან დაკავშირებით პარტიაში გარკვეული აზრთა სხვადასხვაობაა.

"გარკვეული აზრთა სხვადასხვაობა არის იმასთან დაკავშირებით, თუ რა იქნება საუკეთესო ფორმა ნიკა მელიას გათავისუფლების. არსებობს მთელი რიგი სხვა საკითხებიც, რომელთა მნიშვნელობის ნიველირებას, ასევე, არ მოვახდენდი. მაგალითად, ის, რომ საარჩევნო რეფორმა უნდა იყოს იმგვარი, რომელიც სამართლიანი არჩევნების ჩატარების შესაძლებლობას მოგვცემს. დამატებით დეტალებში არ შევალ იმისთვის, რომ დავტოვოთ მაქსიმალურად შესაძლებლობა, რათა შეთანხმება შედგეს", — განაცხადა ბოკუჩავამ.

19 აპრილს ცნობილი გახდა, რომ ქართული ოცნება შარლ მიშელის ახალ დოკუმენტს, რომელშიც ნაცვლად მათ მიერ შეთავაზებული 40%-ისა, შეთავაზებულია 43%, ხელს მოაწერს.

ამასთან, რამდენიმე საათით ადრე გავრცელებულ განცხადებაში ქართულმა ოცნებამ თქვა, რომ თუ გიორგი რურუას საქართველოს პრეზიდენტი შეიწყალებს, ისინი კრიტიკულ პოზიციას არ დააფიქსირებენ, მიუხედავად იმისა, რომ ეს მართლმსაჯულებაში ჩარევის უხეშ მაგალითად მიაჩნიათ.

მმართველი პარტიის გარდა მიშელის დოკემენტზე ხელმოწერის მზაობა ოპოზიციური პარტიების ნაწილმაც გამოთქვა.

ქართულ ოცნებასა და ოპოზიციას ევროკავშირის წარმომადგენლობაში გამართულ შეხვედრაზე 18 აპრილს ახალი დოკუმენტი შესთავაზეს, თუმცა მმართველი პარტია ადგილზე არ იმყოფებოდა.

დოკუმენტში საუბარია პოლიტპატიმრებზეც. კერძოდ, საუბარია იმაზე, რომ დოკუმენტის ხელმოწერიდან 1 კვირის განმავლობაში ორ შემთხვევაში, იგულისხმება ნიკა მელიასა და გიორგი რურუას საქმეები, იქნება ამნისტია ან სხვა ნაბიჯი, რომელსაც ანალოგიური შედეგი ექნება. საუბარია ამნისტიის კანონზეც, რომელიც 2019 წლის 20 ივნისის აქციებს ეხება. პარტიები ცვლილებების მხარდასაჭერად პარლამენტში უნდა შევიდნენ.

გარდა ამისა, დოკუმენტში საუბარია საარჩევნო რეფორმაზე, სადაც ვადამდელ არჩევნებთან დაკავშირებით ქართული ოცნების წინადადება გაზიარებულია, თუმცა ნაცვლად 40%-სა, შემოთავაზებულია 43%. კერძოდ, ვადამდელი არჩევნები ჩატარდება 2022 წელს, თუ 2021 წლის თვითმმართველობის არჩევნებში მმართველი პარტია 43%-ზე ნაკლებ პროპორციულ ხმას აიღებს.

დოკუმენტი მოიცავს სასამართლო რეფორმას, პარლამენტში ძალაუფლების გადანაწილებასა და მომავალ არჩევნებსაც.

ამავე თემაზე: