19 თებერვალს რუსთავი 2-ზე, ეკა კვესიტაძის საავტორო გადაცემაში განსხვავებული აქცენტები, ოდესის გუბერნატორ მიხეილ სააკაშვილთან ექსკლუზიური ინტერვიუ გავიდა, რომელშიც საქართველოს ექსპრეზიდენტი უკრაინაში საკუთარ გეგმებზე საუბრობს.

სააკაშვილის თქმით, მისი მიზანია უკრაინაში სრულიად ახალი პოლიტიკური ელიტის მოყვანა და ახალი თამაშის წესების დამკვიდრება.

"ჩვენ დავიწყეთ აქ დაახლოებით იგივე მოძრაობა, რაც დავიწყეთ საქართველოში 90-იანი წლების ბოლოს. შევკრიბეთ ბევრი ახალგაზრდა - პერსპექტიული პარლამენტარი, მინისტრები და მათი მოადგილეები, რეგიონალური ლიდერები, არასამთავრობო ორგანიზაციები და ჟურნალისტები. 22 თებერვლიდან მექნება 22 დღიანი გასვლა უკრაინის 22 ქალაქში. ყველგან გავაკეთებთ დიდ შეხვედრას ხალხთან", - თქვა მიხეილ სააკაშვილმა.

ჟურნალისტის კითხვაზე, გეგმავს თუ არა პარტიის ჩამოყალიბებას, მიხეილ სააკაშვილმა უპასუხა, რომ ეს მოძრაობა პარტია არ იქნება. "ახალ პარტიებს აქ უყურებენ როგორც ოლიგარქების პროექტებს", - დასძინა მან.

სააკაშვილი მიიჩნევს, რომ მის ახალ მოძრაობას უკრაინელი ხალხი მაღალი ნდობით უყურებს.

"იციან, რომ მე ეს გავლილი მაქვს. აქ ერთი-ერთში იგივე გამოწვევებია, რაც საქართველოში მქონდა. ეს ადამიანები თავიანთი ბრალდებებითა და ლაპარაკის მანერითაც კი, 20 წლის წინანდელ ქართველ ჩინოვნიკებს მაგონებენ. ანტისახელმწიფოებრივი, კორუმპირებული მთავრობა უნდა წავიდეს უკრაინიდან" - აღნიშნა ოდესის გუბერნატორმა.

ამერიკის რესპუბლიკური ინსტიტუტის მიერ ჩატარებული კვლევის მიხედვით, რამდენიმე თვის წინ სააკაშვილი ნდობის რეიტინგით უკრაინის ყველაზე პოპულარული პოლიტიკოსი იყო.