"ზოგიერთებს ისიც ავიწყდებათ, რომ იმ "სხვას", რომელსაც 20 ივნისის შემდეგ მთელი საქართველო აგინებდა და 0% ჰქონდა რეიტინგი, როგორ დაუდგა პარტია გვერდით, დაიცვა, დაბანა, ჩააცვა და დავარცხნა", — ასე ეხმიანება ქართული ოცნების დეპუტატი და პოლიტსაბჭოს წევრი დიმიტრი სამხარაძე თანაგუნდელების პარტიიდან წასვლას და ექსპრემიერის, გიორგი გახარიას ახალი პარტიის შესახებ გავრცელებულ ცნობებს. ირონიულ პოსტში სამხარაძე წერს, რომ გახარიამ თავისიანებს პირველ ტურშიც ვერ მოაპოვებინა გამარჯვება და რეიტინგს ბიძინა ივანიშვილის წყალობით ჰქონდა.

"მეცინება, როდესაც ვინმე ამბობს, ოცნებამ სხვისი სახელის და რეიტინგის წყალობით გაიმარჯვა, არჩევნებშიო. მით უმეტეს მაშინ, როდესაც ბატონი ბიძინა იყო პარტიის თავმჯდომარე და საარჩევნო კამპანიის დროს, თავიანთ მაჟორიტარულ ოლქებში, იმ “სხვისის" გუნდის წევრები, თავმჯდომარის სახელის და რესურსის გამოყენებით დარბოდნენ. მიუხედავად ამისა, იმ "სხვამ" მისიანებს პირველ ტურშიც კი ვერ მოაპოვებინა გამარჯვება.

ზოგიერთებს ისიც ავიწყდებათ, რომ იმ "სხვას", რომელსაც 20 ივნისის შემდეგ მთელი საქართველო აგინებდა და 0% ჰქონდა რეიტინგი, როგორ დაუდგა პარტია გვერდით, დაიცვა, დაბანა, ჩააცვა და დავარცხნა. მე თუ მკითხავთ, თუ მინდა ვიყო მართალი კაცი, მანდატს დავტოვებდი და თვითმმართველობის არჩევნებთან ერთად რომ გაიმართებოდა შუალედური საპარლამენტო არჩევნები, კონკრეტულ საარჩევნო ოლქში, მაშინ მივიღებდი მონაწილეობას, რომ იმ "სხვის" მაგრობა დამემტკიცებინა ყველასთვის, მაგრამ სადაა მასე სიმართლე", — წერს ის ფეისბუქგვერდზე.

სულ სხვა რიტორიკა ჰქონდა სამხრაძეს იქამდე, სანამ გიორგი გახარია მმართველ გუნდს წარმოადგენდა. მის ფეისბუქგვერდზე იძებნება პოსტები, რომელშიც ის გახარიას აქებს და წერს, რომ ქვეყანას გაუმართლა, მისნაირი პრემიერი რომ ჰყავს

ქართული ოცნების ექვსმა დეპუტატმა პარტია დატოვა და ყოფილი პრემიერმინისტრის, გიორგი გახარიას "პარტიის მშენებლობის ახალ ეტაპზე" უერთდებიან. ესენი არიან:

  1. გიორგი ხოჯევანიშვილი;
  2. მიხეილ დაუშვილი;
  3. ანა ბუჩუკური
  4. ალექსანდრე მოწერელია;
  5. ბექა ლილუაშვილი;
  6. შალვა კერესელიძე

ისინი ამბობენ, რომ იზიარებენ ქართული ოცნებების წარმატებებსა და წარუმატებლობებს, ამავე დროს კი, გრძნობენ პასუხისმგებლობას შეცდომებზეც და სწორედ ამ პასუხისმგებლობის გრძნობით დგამენ ამ ნაბიჯს.

დეპუტატ გიორგი ხოჯევანიშვილის თქმით, მოლოდინი აქვს, რომ ე.წ. "გახარიას გუნდს" სხვა დეპუტატებიც შეუერთდებიან.