ქართული ოცნების დეპუტატის, ანრი ოხანაშვილის განცხადებით, პოლიტიკაში არ შეიძლება სუბიექტური მიდგომით იღებდე გადაწყვეტილებებს იმაზე, თუ რომელ გუნდში იქნები. ასე ეხმაურება ის მმართველი პარტიიდან 6 დეპუტატის წასვლას.

"პოლიტიკაში საქმიანობა უნდა ეფუძნებოდეს რამდენიმე ძირითად პრინციპს. ეს არის — პოლიტიკური სიმტკიცე, გუნდის ერთგულება და საკითხებისადმი სახელმწიფოებრივი მიდგომა. აქიდან გამომდინარე, აქ არ უნდა იყოს ადგილი პირადი ინტერესებისთვის და სუბიექტური მიდგომით არ შეიძლება იღებდე გადაწყვეტილებას, რომელ გუნდში იქნები.

მე არ ვიზიარებ იმ პოზიციას, რაც გაჟღერდა და სწორედ ეს არის ქართული ოცნების ღირებულებები, რომ სიმტკიცე, გუნდის ერთგულება, სახელმწიფოებრივი მიდგომა და საზოგადოებრივ ინტერესებზე ორიენტირებული გადაწყვეტილებების მიღება, რომელიც სჭირდება დღეს ჩვენს ქვეყანას. ზოგს შეუძლია ამ პრინციპების ერთგულება, ზოგს პოლიტიკაში შეიძლება ეს ვერ შეეძლოს. ეს არის მათი არჩევანი, აქიდან გამომდინარე, იმ განცხადებებს, რაც გაჟღერდა არ ვიზიარებ, თუმცა დაველოდოთ, ვინ რა პლატფორმას შექმნის", — თქვა მან.

ქართული ოცნების ექვსმა დეპუტატმა პარტია დატოვა და ყოფილ პრემიერმინისტრს, გიორგი გახარიას "პარტიის მშენებლობის ახალ ეტაპზე" უერთდებიან. ესენი არიან:

  1. გიორგი ხოჯევანიშვილი;
  2. მიხეილ დაუშვილი;
  3. ანა ბუჩუკური
  4. ალექსანდრე მოწერელია;
  5. ბექა ლილუაშვილი;
  6. შალვა კერესელიძე

ისინი ამბობენ, რომ იზიარებენ ქართული ოცნებების წარმატებებსა და წარუმატებლობებს, ამავე დროს კი, გრძნობენ პასუხისმგებლობას შეცდომებზეც და სწორედ ამ პასუხისმგებლობის გრძნობით დგამენ ამ ნაბიჯს.